அம்மா திட்டங்களை காப்பி அடித்த பாஜக தேர்தல் அறிக்கை

லக்னோ: உத்தரப் பிரதேசத்தில் நடைபெற இருக்கும் சட்டப்பேரவைத் தேர்தலுக்கான பாஜகவின் தேர்தல் அறிக்கை தமிழகத்தில் முன்னாள் முதல்வர் ஜெயலலிதாவின் திட்டங்களை காப்பியடித்து உருவாக்கப்பட்டது என்று விமர்சனத்துக்கு ஆளாகியுள்ளது.

உத்தரப் பிரதேசத்தில் சட்டப்பேரவைத் தேர்தல் பிப்ரவரி 11ஆம் தேதி தொடங்கி மார்ச் 8ஆம் தேதி வரை 7 கட்டங்களாக நடைபெற உள்ளது. ஆளும் சமாஜ்வாதி கட்சியும் காங்கிரஸ் கட்சியும் கூட்டணி அமைத்து இத்தேர்தலை எதிர்கொள்கின்றன. பகுஜன் சமாஜ் கட்சியும் பாஜகவும் தனித்துப்போட்டியிடுவதாக அறிவித்துள்ளன.

இந்நிலையில், இன்று உத்தரப் பிரதேசத்தின் லக்னோவில் பாஜக தேசியத் தலைவர் அமித் ஷா அக்கட்சியின் தேர்தல் அறிக்கையை வெளியிட்டார். அயோத்தியில் ராமர் கோயில் கட்டுவதற்கு சட்டரீதியான நடவடிக்கை, மாணவர்களுக்கு இலவசமாக இன்டரெநெட் வசதியுடன் கூடிய லேப்டாப், ஏழைகளுக்கு இலவச சமையல் எரிவாயு சிலிண்டர் ஆகியவை பாஜகவின் முக்கிய வாக்குறுதிகளாக பார்க்கப்படுகின்றன.

பல்கலைக்கழகங்களுக்கு இலவச வை-ஃபை, விவசாயிகளுக்கு வட்டியில்லா கடன், நொய்டா-லக்னோ மெட்ரோ ரயில், மாட்டிறைச்சி கூடங்கள் மூடல், நேர்முகத் தேர்வு இல்லாமல் குரூப் 3, குரூப் 4 தேர்வு, 45 நாட்களில் மாநிலத்தில் அனைத்து குற்றவாளிகளையும் சிறைக்கு அனுப்புவது, உணவு பதப்படுத்தும் மையங்கள், 24 மணி நேரமும் தடையில்லாத மின் விநியோகம், விவசாயிகள் மற்றும் ஏழைகளுக்கு குறைந்த விலையில் மின்சாரம், மும்முறை தலாக் முறை பற்றிய பெண்களின் கருத்துகளை உச்சநீதிமன்றத்தில் எடுத்துரைப்பது, பெண் குழந்தைகள் பாதுகாப்பு மற்றும் ஈவ் டீசிங் தடுப்பு, மாணவர்களுக்கு கல்வி உதவித்தொகை வழங்க ரூ. 500 கோடி ஒதுக்கீடு உள்ளிட்ட பல கவர்ச்சிகரான வாக்குறுதிகள் உள்ளன.

மாணவர்களுக்கு லேப்டாப் வழங்குவது, தடையில்லாத மின்சாரம் ஆகிய அறிவிப்புகளால் பாஜகவின் தேர்தல் அறிக்கை தமிழகத்தில் முன்னாள் முதல்வர் ஜெயலலிதாவின் திட்டங்களை காப்பியடித்து உருவாக்கப்பட்டிருப்பதாக விமர்சனத்துக்கு ஆளாகியுள்ளது.