பாக்., ஹாக்கி வீரருக்கு உதவிக்கரம் நீட்டும் சென்னை

சென்னை: இதயமாற்று அறுவை சிகிச்சை செய்வதற்காக இந்தியா வருவதற்கு விரும்பியுள்ள பாகிஸ்தான் ஹாக்கி அணியின் முன்னாள் வீரர் மன்சூர் அகமதுக்கு சென்னை ஹாக்கி கூட்டமைப்பு உதவக் முன்வந்துள்ளது.

பாகிஸ்தான் ஹாக்கி அணியின் முன்னாள் வீரர் மன்சூர் அஹ்மத் தனது இதயத்திலுள்ள பேஸ்மேக்கரில் (செயற்கை இதயமுடுக்கி) ஏற்பட்டுள்ள கோறாறு காரணமாக அவதிப்பட்டு வருகிறார். கராச்சியில் உள்ள மருத்துவமனையில் சிகிச்சை பெற்றுவரும் அவர் மேல் சிகிச்சைக்காக இந்தியா வர அனுபதி கோரியுள்ளார்.

இந்நிலையில், சென்னை ஹாக்கி கூட்டமைப்பு மன்சூருக்கு உதவிக்கரம் நீட்ட முன்வந்துள்ளது. இதற்காக, பிரபல இதய அறுவை சிகிச்சை வல்லுநர் கே.ஆர்.பாலகிருஷ்ணனுக்கு மன்சூரின் மருத்துவ அறிக்கைகளை சென்னை ஹாக்கி கூட்டமைப்பு அனுப்பியுள்ளது.

தற்போது பாலஸ்தீனத்தில் உள்ள மருத்துவர் பாலகிருஷ்ணன் நாடு திரும்பியதும் மன்சூருக்கு சிகிச்சை அளிப்பது குறித்து ஆலோசிக்கப்படும் என்று கூறியுள்ளார்.

49 வயதான மன்சூர் இது குறித்து வீடியோ ஒன்றை நேற்று வெளியிட்டார். அதில் "எனக்கு இன்றைக்கு இதயம் வேண்டும். அதற்கு இந்திய அரசாங்கத்தின் உதவி எனக்கு தேவை" என்று அவர் கூறியுள்ளார். மேலும், தனக்கு கூடிய விரைவில் விசா வழங்க இந்திய வெளியுறத்துறை அமைச்சர் சுஷ்மா ஸ்வராஜிடமும் கோரிக்கை விடுத்துள்ளார்

இந்தியா மற்றும் பாகிஸ்தானுக்கிடையே சுமூக உறவு இல்லாத போதும் மருத்துவம், புனிதப் பயணம் போன்றவற்றுக்கு இரு நாடுகளும் அண்டைநாட்டுமக்களை அனுமதிக்க ஒப்பந்தம் செய்துள்ளன. இதனால், பாகிஸ்தானை சேர்ந்தவர்கள் இந்தியாவில் சிகிச்சை பெற விரும்பினால், மருத்துவ விசா வேண்டி விண்ணப்பிக்கலாம்.

பாகிஸ்தானில் ஹாக்கி ஜாம்பவானான மன்சூர் அஹ்மத் அந்நாட்டு அணியின் கேப்டனாக 300க்கும் மேற்பட்ட சர்வதேச போட்டிகளில் பங்குபெற்றவர்.

இந்தியாவுக்கு வந்து தான் எதிர்த்து விளையாடிய இந்திய ஹாக்கி அணியின் முன்னாள் கேப்டன் தன்ராஜ் பிள்ளையை சந்திக்க ஆவலுடன் காத்திருப்பதாகவும் மன்சூர் தெரிவித்துள்ளார்.