பட்ஜெட் உரையை மருத்துவமனையிலேயே தயார் செய்த பாரிக்கர்

உடல்நலக்குறைவால் மருத்துவமனையில் அனுமதிக்கப்பட்டுள்ள கோவா முதல்வர் மனோகர் பாரிக்கர் மருத்துவமனையிலேயே பட்ஜெட் உரையைத் தயார் செய்துவிட்டாராம்!

கோவா மாநில முதல்வர் மனோகர் பாரிக்கர் கடந்த 15ஆம் தேதி வயிற்றுவலி காரணமாக தனியார் மருத்துவமனையில் அனுமதிக்கப்பட்டார். உடல்நிலையில் முன்னேற்றம் இல்லாத நிலையில், மும்பை மருத்துவமனையில் தற்போது சிகிச்சை பெறுகிறார்.

சிகிச்சை பெறும் மனோகர் பாரிக்கரை பிரதமர் நரேந்திர மோடி, மத்திய அமைச்சர்கள், மகாராஷ்டிர ஆளுநர் வித்தியாசாகர் ராவ் மற்றும் முதல்வர் தேவேந்திர பட்நாவிஸ், துணை குடியரசுத் தலைவர் வெங்கய்யா நாயுடு உள்ளிட்ட பலர் நலம் விசாரித்து வருகின்றனர்.

இந்நிலையிலும், பாரிக்கர் எதிர்வரும் மாநில சட்டப்பேரவை பட்ஜெட் கூட்டத்தொடருக்காக தனது பட்ஜெட் உரையை மருத்துவமனையிலேயே தயார் செய்து வருகிறார். பெரும் பகுதியை முடித்துவிட்ட அவர் இறுதிப் பகுதியை மட்டும் தற்போது தயாரித்து வருகிறாராம்.

பாரிக்கர் சட்டப்பேரவைக்கு வர முடியாத நிலையில் பொதுப்பணித்துறை அமைச்சர் ராமகிருஷ்ண தவாலிகர் பட்ஜெட் உரையை பாரிக்கர் சார்பாக வாசிப்பார் என்றும் தெரிகிறது. ஆனால், பாரிக்கர் வரும் புதன்கிழமைக்குள் உடல்நலம் பெற்று அவைக்கு வந்துவிட்டால் அவரே பட்ஜெட் தாக்கல் செய்வார் என்று தவாலிகர் தெரிவித்துள்ளார்.