காங்கிரஸ் தலைவர் சோனியா மருத்துவமனையில் அனுமதி

டெல்லி: உடல் நலக்குறைவு காரணமாக காங்கிரஸ் தலைவர் சோனியா காந்தி மருத்துவமனையில் அனுமதிக்கப்பட்டுள்ளார்.

காங்கிரஸ் தலைவராக நீண்ட காலம் பொறுப்பு வகித்து வரும் சோனியா காந்தி கடந்த சில ஆண்டுகளாகவே உடல் நலம் பாதிக்கப்பட்டுள்ளார். அடிக்கடி அமெரிக்கா சென்று சிகிச்சை பெற்று வரும் அவருக்கு, எந்த மாதிரியான உடல் நல பாதிப்பு என்பதை வெளிப்படுத்த காங்கிரஸ் மறுத்து வருகிறது

உடல்நலக்குறைவு காரணமாக, கட்சி நிகழ்ச்சிகள், கூட்டங்களில் பங்கேற்காமல் தவிர்த்து வந்த நிலையில், காங்கிரஸ் கட்சியின் தலைவராக அவரது மகன் ராகுல் காந்தி பொறுப்பேற்றார். ஆனால், அவரது தலமையில் கடந்த மக்களவை தேர்தலை சந்தித்த காங்கிரஸ் கட்சி படு தோல்வியடைந்தது.

எல்லாமே வெற்று அறிவிப்புகள்தான்: நிர்மலா சீதாராமனை கலாய்த்த ராகுல்!!

இதையடுத்து, தேர்தல் தோல்விக்கு பொறுப்பேற்று காங்கிரஸ் கட்சியின் அகில இந்திய தலைவர் பதவியை ராகுல் காந்தி ராஜினாமா செய்தார். கட்சித் தொண்டர்கள், மூத்த தலைவர்கள் என ஏராளமானோர் ராகுலின் ராஜினாமாவுக்கு எதிர்ப்பு தெரிவித்து தலைவர் பதவியை அவர் தொடர வேண்டும் என விருப்பம் தெரிவித்த போதும், தலைவர் பதவியை ஏற்க ராகுல் மறுப்பு தெரிவித்து விட்டார்.

அதன்பின்னர் கூடிய காங்கிரஸ் காரிய கமிட்டி கூட்டத்தில் அகில இந்திய காங்கிரஸ் கட்சியின் முழு நேர தலைவராக ஒருவர் தேர்ந்தெடுக்கப்படும் வரை இடைக்காலத் தலைவராக சோனியா காந்தி தொடர வேண்டும் என கோரிக்கை வைக்கப்பட்டு ஒருமனதாக தீர்மானம் நிறைவேற்றப்பட்டது. இதனைத்தொடர்ந்து, காங்கிரஸ் கட்சியின் தலைவராக சோனியா செயல்பட்டு வருகிறார்.


இந்நிலையில், காங்கிரஸ் கட்சியின் இடைக்கால தலைவர் சோனியா காந்தி டெல்லி கங்கா ராம் மருத்துவமனை உடல் நலக்குறைவு காரணமாக அனுமதிக்கப்பட்டுள்ளார். நெஞ்சு வலி காரணமாக அவர் மருத்துவமனையில் அனுமதிக்கப்பட்டுள்ளார் என தகவல் வெளியான நிலையில், வழக்கமான மருத்துவ பரிசோதனைகளுக்காகவே அவர் அனுமதிக்கப்பட்டுள்ளதாக தெரிவிக்கப்பட்டுள்ளது.