கொரோனா பாதிப்பு!
இந்தியாவில் கடந்த 24 மணி நேரத்தில்14 ஆயிரத்து 516 பேர் கொரோனாவால் பாதிக்கப்பட்டுள்ளனர். ஒரே நாளில் இவ்வளவு பேர் பாதிக்கப்பட்டுள்ளதால் ஒட்டுமொத்த பாதிப்பு 4 லட்சத்தை நெருங்கியுள்ளது. இந்தியாவில் இதுவரை 3 லட்சத்து 95 ஆயிரத்து 48 பேர் கொரோனாவால் பாதிக்கப்பட்டது உறுதி செய்யப்பட்டுள்ளது.
கொரோனா பலி - குணமடைந்தவர்கள் எண்ணிக்கை!
அதேசமயம் குணமடைந்து வீடு திரும்புபவர்களின் எண்ணிக்கையும் அதிகரித்து வருகிறது. இதுவரை 2 லட்சத்து 13 ஆயிரத்து 831பேர் நலமடைந்து வீடு திரும்பியுள்ளது நம்பிக்கை ஏற்படுத்தும் விதமாக அமைந்துள்ளது. கடந்த 24 மணி நேரத்தில் நாடு முழுவதும் 375 பேர் கொரோனாவால் மரணமடைந்துள்ளனர். இதனால் பலியானவர்கள் எண்ணிக்கை 12 ஆயிரத்து 948ஆக அதிகரித்துள்ளது.
முதல் நான்கு மாநிலங்கள்!
நாட்டிலேயே அதிக பாதிப்புகளை சந்திக்கும் மாநிலங்களாக மகாராஷ்டிரா, டெல்லி, தமிழ்நாடு, குஜராத் ஆகிய மாநிலங்கள் உள்ளன. நாட்டின் ஒட்டுமொத்த பாதிப்பில் 64 சதவீதம் முதல் 68 சதவீதம் வரை பாதிப்பு இந்த மாநிலங்களில் மட்டுமே பதிவாகியுள்ளது.
பாதிப்பு குறையும் மகாராஷ்டிரா
கடந்த சில நாள்களாக மகாராஷ்டிரா, குஜராத் மாநிலங்களில் பாதிப்பு சற்று குறையத் தொடங்கியுள்ளது. ஒட்டுமொத்த பாதிப்பில் 37 சதவீதம் இருந்த மகாராஷ்டிரா 31 சதவீதமாகவும், 12 சதவீதமாக இருந்த குஜராத் 7 சதவீதமாகவும் குறைந்துள்ளது. ஆனால் அதே சமயம் தமிழ்நாடு, டெல்லியில் பாதிப்பு தொடர்ந்து அதிகரித்து வருவதால் இந்த நான்கு மாநிலங்களின் மொத்த பாதிப்பு சதவீதம் குறையாமல் உள்ளது.