தகவல் ஆணையர்களுக்கு சம்பளம் கட்; தாமாக முன் வந்து கொடுத்த தேர்தல் ஆணையர்கள்!

டெல்லி: அனைத்து தகவல் ஆணையர்களும் ஒரு வருடத்திற்கு அடிப்படை சம்பளத்தில் 30 சதவீதம் குறைப்பை மேற்கொள்ள வேண்டும் என மத்திய தகவல் ஆணையம் தீர்மானம் நிறைவேற்றியுள்ளது.

கொரோனா வைரஸின் தாக்கம் நாளுக்கு நாள் இந்தியாவில் அதிகரித்து வருகிறது. இதனை கட்டுப்படுத்த 21 நாட்கள் ஊரடங்கு உத்தரவை பிரதமர் மோடி பிறப்பித்துள்ளார். இந்தியா முழுவதும் அத்தியாவசியப் பணிகளைத் தாண்டி வேறு எந்தவொரு பணியும் நடக்கவில்லை.

இதனால் பெரும் பொருளாதார இழப்பு ஏற்பட்டுள்ளது. பெருமளவில் பணத்தேவைகளும் ஏற்பட்டுள்ளது. இதனை சரிகட்ட தொழிலதிபர்கள், திரைப்பிரபலங்கள், சாமானியர்கள், அரசியல்வாதிகள் என பல்வேறு தரப்பினரும் தங்களால் இயன்ற நிதியுதவிகளை செய்து வருகின்றனர்.

விரைவு அஞ்சலில் மருந்துகளை அனுப்ப முன்னுரிமை: மத்திய அமைச்சர்

அதுதவிர, அரசு அலுவலர்கள் தங்களது ஒரு மாத ஊதியம், ஒரு நாள் ஊதியத்தை வழங்கி தங்களது பங்களிப்பை செய்து வருகின்றனர். எம்.எல்.ஏ.க்கள், எம்.பி.க்களும் தங்களது தொகுதி மேம்பாட்டு நிதி, ஊதியம் உள்ளிட்டவற்றை கொரோனா தடுப்பு நடவடிக்கைகளுக்காக வழங்கி வருகின்றனர்.

இந்நிலையில், அனைத்து தகவல் ஆணையர்களும் ஒர் ஆண்டிற்கு அடிப்படை சம்பளத்தில் 30 சதவீதம் குறைப்பை மேற்கொள்ள வேண்டும் என மத்திய தகவல் ஆணையம் தீர்மானம் நிறைவேற்றியுள்ளது.

அதுதவிர, இந்தியத் தேர்தல் ஆணையத்தின் தலைமைத் தேர்தல் ஆணையர் சுனில் அரோரா மற்றும் தேர்தல் ஆணையர்கள் அசோக் லாவாசா, சுஷில் சந்திரா ஆகியோர் ஆணையம் தமக்கு வழங்கி வரும் அடிப்படை ஊதியத்தின் 30 சதவீதத்தை, 2020ஆம் ஆண்டு ஏப்ரல் மாதம் 1ஆம் தேதி முதல் ஒர் ஆண்டுகாலம், தானாக முன் வந்து குறைக்க முடிவு செய்துள்ளனர்.


கொரோனா தொற்றுநோயின் பரவலைக் கட்டுப்படுத்துவதற்கும், பொது சுகாதாரத்திலும், தேசிய பொருளாதாரத்திலும் அதன் தாக்கத்தைக் குறைக்கவும் எடுக்கப்படும் பல்வேறு நடவடிக்கைகளுக்கு அனைத்து மட்டங்களில் இருந்தும் பேருதவி தேவைப்படும் இந்த நிலையில், அரசு வழங்கும் சம்பள சுமையை குறைப்பது உள்ளிட்ட நடவடிக்கைகள் அரசுக்கு உதவியாக இருக்கும் என்பது குறிப்பிடத்தக்கது.