ஜீன்ஸ் படத்தை காப்பியடித்த டெல்லி: மாத்தி ஆபரேஷன் செய்த மருத்துவமனை!

தலையில் காயம் என்று மருத்துவமனைக்குச் சென்றவருக்கு காலில் ஆபரேஷன் செய்த சம்பவம் டெல்லியில் அதிர்ச்சியை ஏற்படுத்தியுள்ளது. டெல்லியில் உள்ள சுஷ்ருதா ட்ரவுமா என்ற மருத்துவமனை, அம்மாநில அரசுக்குக் கீழ் இயங்கி வருகிறது. இந்த மருத்துவமனையில், தலை மற்றும் முகத்தில் ஏற்பட்ட காயத்திற்கு சிகிச்சை பெறுவதற்கு விஜயேந்திர தியாகி என்பவர் அனுமதிக்கப்பட்டிருந்தார். இதே வார்டில், மற்றொரு நோயாளி காலில் அடிபட்ட நிலையில், அனுமதிக்கப்பட்டிருந்தார். காலில் அடிபட்டவருக்குச் செய்ய வேண்டிய அறுவை சிகிச்சையை மாத்தி தலையில், காயம் ஏற்பட்டவருக்கு செய்துள்ளனர். ஒரு மருத்துவமனையில் நடந்த இச்சம்பவம் மற்ற நோயாளிகளையும், அவரது உறவினர்களையும் அதிர்ச்சியில் ஆழ்த்தியுள்ளது.

இது குறித்துப் பேசிய விஜயேந்திர தியாகியின் மகன், கூறுகையில், தலையில் காயம் என்று அனுமதிக்கப்பட்ட எனது தந்தைக்கு காலில் அறுவை சிகிச்சை செய்யப்பட்டுள்ளது. அவரது வலது காலில் துளை போட்டு சிறிய ஊசியைப் பொருத்தியுள்ளனர்.
இதில், எனது தந்தைக்கு அனஸ்தீசியா கொடுக்கப்பட்டதால் என்ன நடந்தது என்று அவருக்கு தெரியாது. எனது அப்பாவுக்கு இன்னும் தலையில் வலி இருந்து கொண்டேயிருக்கிறது. இதன் காரணமாக தற்போது, அவரால் நடக்க முடியாத சூழ்நிலை ஏற்பட்டுள்ளது என்று தெரிவித்துள்ளார்.
இதையடுத்து, தவறாக அறுவை சிகிச்சை செய்யப்பட்டதைக் கண்டறிந்த சில மணி நேரத்தில் விஜயேந்திர தியாகிக்கு தலையில் சிகிச்சை அளிக்கப்பட்டுள்ளது. தொடர்ந்து அலட்சியம் காட்டிய மருத்துவமனை மீதும், தவறான சிகிச்சை அளித்த மருத்துவர்கள் மீதும் வழக்குப்பதிவு செய்யயிருப்பதாக பாதிக்கப்பட்ட உறவினர்கள் தெரிவித்துள்ளனர்.

இது குறித்து விளக்கமளித்துள்ள மருத்துவமனை நிர்வாகம், அலட்சியமாக செயல்பட்ட மருத்துவர், யாருடைய மேற்பார்வையில்லாமல் சிகிச்சை அளிக்க தடை விதிக்கப்பட்டுள்ளது. இச்சம்பவத்தை விசாரிக்க குழு ஒன்று நியமிக்கப்பட்டுள்ளது.