#DeMonetisation- பிரதமர் ஊழல் செய்துள்ளார்: ஆதாரம் உள்ளது என ராகுல் அதிரடி

புதுதில்லி: பிரதமர் மோடி ஊழல் செய்ததற்கான ஆதாரம் என்னிடம் உள்ளது என காங்கிரஸ் கட்சியின் துணைத் தலைவர் ராகுல் தெரிவித்துள்ளார்.

கருப்புப் பணம் மற்றும் கள்ள நோட்டுகளை ஒழிக்கும் நடவடிக்கை என, ரூ.500, 1000 நோட்டுகள் செல்லாது #DeMonetisation என மத்திய அரசு, கடந்த மாதம் 8-ம் தேதியன்று திடீரென அதிரடியாக அறிவித்தது. மாற்று வழிகளை மத்திய அரசு அறிவித்திருந்தாலும், சில்லறை தட்டுப்பாடு, ஏடிஎம்-களில் போதிய பணம் இல்லாத சூழல், வங்கிகளில் நீண்ட வரிசை, அத்தியாவசிய பொருட்களை வாங்க முடியாத நிலை என்பன உள்ளிட்ட பல்வேறு காரணங்களால் பொதுமக்கள் மிகுந்த சிரமத்துக்கு ஆளாகியுள்ளனர்.

ரூபாய் நோட்டுகள் விவகாரத்தை நாடாளுமன்றத்தில் எழுப்பியுள்ள காங்கிரஸ் உள்ளிட்ட எதிர்க் கட்சிகள், இரு அவைகளையும் செயல்பட விடாமல் முடக்கியுள்ளன. இதனிடையே, நாடாளுமன்ற வளாகத்தில் எதிர்கட்சித் தலைவர்கள் கலந்து கொண்ட ஆலோசனைக் கூட்டம் நடைபெற்றது.

அதன்பின்னர் எதிர்க்கட்சி பிரதிநிதிகளுடன் செய்தியாளர்களை சந்தித்த காங்கிரஸ் கட்சியின் துணைத்தலைவர் ராகுல் கூறியதாவது: நாடாளுமன்றத்தில் எந்த வித நிபந்தனையுமின்றி நாங்கள் விவாதிக்க தயாராக உள்ளோம். ஆனால், என்னை பேச அரசு அனுமதிப்பதில்லை. ரூபாய் நோட்டுகள் விவகாரத்தில் தனிப்பட்ட முறையில் பிரதமர் மோடி ஊழல் செய்ததற்காக ஆதாரம் என்னிடம் உள்ளது. அவரால் எங்கும் தப்ப்பிவிட முடியாது. ஏழை மக்களுக்கு எதிரான முடிவை பிரதமர் எடுத்துள்ளார். நாட்டு மக்களுக்கு அவர் விளக்கம் அளிக்க வேண்டிய கட்டாயத்தில் உள்ளார் என்றார்.

ரூபாய் நோட்டுகள் விவகாரத்தால் நாடாளுமன்ற இரு அவைகளையும் செயல்பட விடாமல் எதிர்க்கட்சிகள் முடக்கியுள்ளன என்பதும், கடந்த மாதம் 16-ம் தேதியன்று தொடங்கிய நாடாளுமன்ற குளிர்காலக் கூட்டத்தொடர் வருகிற வெள்ளிக்கிழமையுடன் (டிச.16-ம் தேதி) நிறைவடையவுள்ளது என்பதும் குறிப்பிடத்தக்கது.

#DeMonetisation- I have information proving personal corruption of PM Modi: Rahul