திமுக முதல்வர் வேட்பாளர் ஜெகத்ரட்சகன்? பின்னணி இதுதான்!

தமிழகத்தைப் போலவே புதுச்சேரியிலும் இன்னும் மூன்று மாதங்களில் சட்டமன்ற தேர்தல் வரவுள்ளது. அதற்கான தேர்தல் பணிகளின் அனைத்துக் கட்சிகளும் பரபரப்பாக ஈடுபட்டு வருகின்றன.

2016ஆம் ஆண்டு நடைபெற்ற தேர்தலில் திமுக - காங்கிரஸ் கூட்டணி வெற்றி பெற்றது. முதல்வராக காங்கிரஸ் கட்சியைச் சேர்ந்த நாராயாணசாமி தேர்ந்தெடுக்கப்பட்டார். புதுச்சேரி துணை நிலை ஆளுநராக இருக்கும் கிரண்பேடி பல்வேறு நெருக்கடிகளைக் கொடுப்பதால் மக்கள் நலப் பணிகளை செயல்படுத்த முடியவில்லை. முட்டுக்கட்டைப் போடுகிறார் என்ற குற்றச்சாட்டு புதுச்சேரியில் எழுந்துள்ளது.

ஆனால் இதன் விளைவு நாராயணசாமி ஆட்சியையே அதிகம் பாதித்துள்ளது. காங்கிரஸ் கட்சிக்கு உள்ளேயும் கோஷ்டிகள் உருவாகி தேர்தலில் நாராயணசாமிக்கு எதிராக வேலை நடக்கும் அளவுக்கு சென்றுள்ளதாக கூறுகின்றனர். இந்த நிலையில் திமுக காங்கிரஸ் கட்சியுடன் கூட்டணி அமைத்து போட்டியிட்டால் அந்த தாக்குதல் தங்கள் பக்கமும் விழும் என புதுச்சேரி திமுகவினர் மு.க.ஸ்டாலின் கவனத்துக்கு கொண்டு வந்தனர்.

சசிகலா விடுதலை: அமமுகவினருக்கு தினகரன் போட்ட உத்தரவு!

இருபது ஆண்டுகளாக புதுச்சேரியில் திமுக ஆட்சியில் இல்லை என்ற நிலையை மாற்ற நல்ல வாய்ப்பு, ஒரே நேரத்தில் இரு மாநிலங்களில் ஆட்சியைப் பிடிப்பதற்கான சூழல் உள்ளது என திமுக தலைமைக்கு எடுத்துக்கூறப்பட்டதன் விளைவாக ஜெகத்ரட்சகனை புதுச்சேரியின் முதல்வர் வேட்பாளராக அறிவிக்கும் முடிவுக்கு திமுக வந்துள்ளதாக கூறுகின்றனர்.

புதுச்சேரியின் மண்ணின் மைந்தரான ஜெகத்ரட்சகன் வன்னியர் சமூகத்தைச் சேர்ந்தவர் என்பதால் அந்த சமூக வாக்குகள் கணிசமான அளவில் கிடைக்கும் என கணக்கு போடுகின்றனர். அரக்கோணம் எம்பியாக உள்ள ஜெகத்ரட்சகன் தற்போது புதுச்சேரி அரசியல் பணிகளில் தீவிரமாக செயல்பட தயாராகிவிட்டார் என்கின்றனர் புதுச்சேரி திமுகவினர்.

இன்று (ஜனவரி 18) காலை 10 மணிக்குமேல், ஜெகத்ரட்சகன் தலைமையில் புதுச்சேரி பழைய பேருந்து நிலையம் அருகில் உள்ள அண்ணா சிலைக்கு மாலை அணிவித்துவிட்டு அங்கிருந்து ஊர்வலமாக கடலூர் சாலை வழியாக மரப்பாலம் அருகில் உள்ள சுகன்யா திருமண மண்டபத்துக்கு திமுக செயல் வீரர்கள் வருகிறார்கள்.

முடிவை நோக்கி செல்லும் திமுக - காங்கிரஸ் கூட்டணி?

ஊர்வலத்தில் ஐயாயிரம் இரு சக்கர வாகனங்களில், பத்தாயிரம் பேர் கலந்துகொள்ள ஏற்பாடுகள் செய்யப்பட்டுள்ளதாக புதுச்சேரி திமுக பொறுப்பாளர்கள் கூறுகின்றனர். ஊர்வலத்தில் கலந்துகொள்ளும் இரு சக்கர வாகனங்கள், கார்கள், வேன்களுக்கு டீசல், பெட்ரோல் நிரப்பிக்கொள்ள டோக்கன்களும் வழங்கப்பட்டுள்ளதாக கூறுகின்றனர் விவரம் அறிந்தவர்கள்.