காங்கிரஸுக்கு குட்பை சொன்ன பிரபல நடிகை!

பிரபல பாலிவுட் நடிகையான ஊர்மிளா மடோன்கர், காங்கிரஸ் கட்சியிலிருந்து விலகுவதாக இன்று அறிவித்துள்ளார்.
மும்பை மாநகர காங்கிரஸை வலுப்படுத்தும் மிகப்பெரிய இலக்கை மனதில் கொண்டு தான் காங்கிரஸ் கட்சியில் சேர்ந்தேன். ஆனால், உள்கட்சி அரசியலில் எனது பெயரும் அடிபடுவதை நான் விரும்பவில்லை.

அத்துடன் கட்சியை பலப்படுத்துவதற்கு பதிலாக, இதுபோன்ற தேவையற்ற விஷயங்களுக்கு என் பெயர் பயன்படுத்தப்படுவதற்கு எனது அரசியல் மற்றும் சமூக உணர்வு இடம் தரவில்லை. இதன் காரணமாகவே, காங்கிரஸ் கட்சியிலிருந்து விலகுகிறேன் என ஊர்மிளா தெரிவித்துள்ளார்.

இதுதொடர்பாக அவர், காங்கிரஸ் தலைவர் சோனியா காந்திக்கு ராஜினாமா கடிதத்தையும் அனுப்பியுள்ளார். அதில், "தாம் காங்கிரஸ் கட்சியிலிருந்து விலகுவதாகவும், கட்சியில் சேர்ந்து பணியாற்ற வாய்ப்பளித்ததற்கு நன்றி" என குறிப்பிட்டுள்ளார்.


கடந்த மார்ச் 27 -ஆம் தேதி, அப்போதைய காங்கிரஸ் தலைவர் ராகுல் காந்தியை நேரில் சந்தித்து, காங்கிரஸ் கட்சியில் இணைந்தார் ஊர்மிளா.

அவருக்கு, கடந்த மே மாதம் நடைபெற்ற மக்களவைத் தேர்தலில் மும்பை வடக்கு தொகுதியில் போட்டியிடும் வாய்ப்பு வழங்கப்பட்டது. ஆனால், அங்கு அவர் வெற்றி பெறவில்லை என்பது குறிப்பிடத்தக்கது.