பெண் குழந்தைகளுக்கு தொடக்கப்பள்ளி முதல் கல்லூரி வரை இலவசக் கல்வி; முதல்வர் அதிரடி அறிவிப்பு!

பெங்களூரு: பெண் குழந்தைகளுக்கு இலவசக் கல்வி அளிக்கப்படும் என்று கர்நாடக முதல்வர் சித்தராமையா தெரிவித்துள்ளார்.

கர்நாடக மாநிலம் பெங்களூருவில் ’தொலைநோக்கு பார்வை 2025’ என்ற புத்தகம் ஆளும் காங்கிரஸ் அரசால் வெளியிடப்பட்டது. இதில் கலந்து கொண்டு முதல்வர் சித்தராமையா சிறப்புரையாற்றினார்.

அப்போது பேசிய அவர், எதிர்கால திட்டங்களை வகுக்காமல் மாநிலத்தை வளர்ச்சி பாதையில் கொண்டு செல்ல முடியாது. அதற்காகவே ’தொலைநோக்கு பார்வை 2025’ என்ற புத்தகம் வெளியிடப்பட்டுள்ளது.

அனைத்து தரப்பு மக்களையும் உள்ளடக்கிய வளர்ச்சி, விரைவான வளர்ச்சி மற்றும் நிலையான வளர்ச்சி என்ற நோக்கத்தில் காங்கிரஸ் அரசு செயல்பட்டு வருகிறது. கடந்த சட்டமன்ற தேர்தலின் போது, மக்களுக்கு அளித்த 165 வாக்குறுதிகளில் 155 நிறைவேற்றப்பட்டுள்ளன.

அன்ன பாக்ய திட்டத்தின் கீழ் ஏழை குடும்பங்களுக்கு இலவச அரிசி வழங்கப்படுகிறது. இதன்மூலம் 4 கோடி பேர் பயன்பெறுகின்றனர். ‘ஸ்டார்ட் அப்‘ எனப்படும் பொது சுகாதார காப்பீட்டு திட்டம் மூலம், 1.43 லட்சம் குடும்பங்கள் பயன் பெறும்.

பெண் குழந்தைகளுக்கு தொடக்கப்பள்ளி முதல் கல்லூரி வரை இலவச கல்வி வழங்க மாநில அரசு முடிவு செய்துள்ளது. அவர்கள் இனி ஒரு பைசா கூட கல்வி கட்டணம் செலுத்த தேவையில்லை.

கர்நாடகாவில் அமைக்கப்பட்டுள்ள 2 ஆயிரம் மெகாவாட் சூரியசக்தி மின் உற்பத்தி திட்டம், ஏராளமான பலன்களை அளிக்கப் போகிறது என்று முதல்வர் சித்தராமையா கூறினார்.

Free education for girls from primary to College in Karnataka.