12 கிலோ தங்கம் அணிந்து பயணிக்கும் கோல்டன் சாமியார்

மீரட்: 12 கிலோ தங்க நகைகளை அணிந்த சாமியார் ஒருவர், தனது புனித பயணத்தை போலீசார் பாதுகாப்புடன் மேற்கொண்டு வருகிறார்.

டெல்லி காந்திநகர் ஆசிரமத்தை சேர்ந்த சாமியார் ஒருவர், ஆண்டுதோறும் ஹரித்வாரில் உள்ள புனித தலங்களுக்கு பயணம் மேற்கொள்கிறார். இதேபோல் தற்போது 24வது ஆண்டாக தனது பயணத்தை தொடர்கிறார். முதலில் 5 கிலோ தங்க நகைகளை அணிந்து, பயணத்தை தொடங்கிய சாமியார், தற்போது 12 கிலோ தங்கத்தை சேர்த்துள்ளார்.

இவருடைய நகைகளை காண, ஏராளமான பொதுமக்கள் ஆர்வத்துடன் வருகின்றனர். பொதுமக்களிடம் இருந்து சாமியாரை பாதுகாக்க, அவருக்கு போலீசார் பாதுகாப்பு அளித்து வருகின்றனர். மேலும் சாமியாருடன் போலிசாரும் ஆர்வத்துடன் புகைப்படம் எடுத்து கொள்கின்றனர்.

கடந்த ஆண்டு ஹரித்வாரில் இருந்து டெல்லி வருவதற்கு, 72 லட்ச ரூபாய் செலவழித்துள்ளார். இந்த ஆண்டு தனது பயணத்திற்காக ஒரு கோடி ரூபாய் செலவு செய்ய முடிவு செய்துள்ளார். எப்போதும் தன்னை சுற்றி 10 பாதுகாவலர்களுடன் பயணம் மேற்கொள்கிறார்.