Arun Jaitley Health: அருண் ஜெட்லி நலமுடன் இருக்கிறார் - ரயில்வேதுறை அமைச்சர் பியூஷ் கோயல்!

அமெரிக்காவில் சிகிச்சை பெற்று வரும் மத்திய நிதி அமைச்சர் அருண் ஜெட்லி தற்போது நலமுடன் இருக்கிறார் என்று நிதி அமைச்சர் பொறுப்பு பியூஷ் கோயல் தெரிவித்துள்ளார்.

மத்திய நிதியமைச்சர் அருண் ஜெட்லி, சிறுநீரக மருத்துவ பரிசோதனைக்காக அமெரிக்கா சென்றுள்ளார். ஆனால் அவர் 'சாப்ட் டிஸ்யூ சர்கோமா' என்ற அரியவகை கேன்சரால் பாதிக்கப்பட்டுள்ளதாகவும், அதற்கான சிகிச்சைக்காக அமெரிக்காவின் நியூயார்க் சென்றுள்ளதாகவும் தகவல் வெளியானது. அமெரிக்கா சென்றுள்ள அருண் ஜெட்லிக்கு சிறுநீரக மருத்துவ பரிசோதனை முடிந்த பிறகு அவருக்கு கேன்சர் பாதிப்புக்கு சிகிச்சை அளிக்கப்படயிருப்பதாகவும், அதனால், அவர் 2 வார காலம் ஓய்வில் இருக்க வேண்டும் என்றும் மருத்துவர்கள் கூறியுள்ளனர்.

வரும் பிப்ரவரி மாதம் 1ம் தேதி மத்திய இடைக்கால பட்ஜெட் தாக்கல் செய்ய மத்திய அரசு முடிவு செய்துள்ளது. இதற்கு முன்னதாக, நிதி அமைச்சர் பொறுப்பு ரயில்வே துறை அமைச்சர் பியூஷ் கோயலுக்கு கூடுதலாக வழங்கப்பட்டது.

இதையடுத்து அருண் ஜெட்லி உடல்நிலை குறித்து பொறுப்பு நிதியமைச்சர் பியூஷ் கோயல் கூறுகையில், தற்போது அருண் ஜெட்லி நலமுடன் இருக்கிறார். அவரது உடல்நிலையில் முன்னேற்றம் ஏற்பட்டு வருவதாக கூறியுள்ளார் என்பது குறிப்பிடத்தக்கது.