காங்கிரஸ் ஆட்சிக்கு ஆளுநர் அழைப்பு: பிற்பகல் 12 மணிக்கு காங்கிரஸ் தலைவர்கள் சந்திப்பு!

மத்தியப்பிரதேச மாநிலத்தில் காங்கிரஸ் ஆட்சியமைக்க ஆளுநர் அழைப்பு விடுத்ததைத் தொடர்ந்து பிறபகல் 12 மணிக்கு காங்கிரஸ் தலைவர்கள் அவரை சந்திக்கின்றனர்.

மத்தியப்பிரதேச மாநிலத்தில் கடந்த நவம்பர் 28ம் தேதி ஒரே கட்டமாக சட்டமன்ற தேர்தல் நடந்தது. இதைத் தொடர்ந்து நேற்று காலை 8 மணி முதல் வாக்கு எண்ணிக்கை தொடங்கியது. மொத்தம் 230 தொகுதிகளைக் கொண்ட மத்தியப்பிரதேச மாநிலத்தில், ஆட்சி அமைப்பதற்கு 116 இடங்களில் வெற்றி பெற்றிருக்க வேண்டும். இந்த மாநிலத்தில், ஆளும் பாஜக மற்றும் காங்கிரஸ் இடையே கடும் போட்டி நிலவியது.

Also Read This: மத்தியப் பிரதேசம் சட்டமன்ற தேர்தல் முடிவுகள்: பாஜக ஆட்சியை பறித்த காங்கிரஸ்

Also Read This: மத்தியப் பிரதேசம் சட்டமன்ற தேர்தல் முடிவுகள்: 114 இடங்களை கைப்பற்றி பாஜகவை விரட்டியடித்த காங்கிரஸ்!

இந்த நிலையில், 24 மணிநேரத்திற்குப் பிறகு முழுமையாக வெளியான வாக்கு எண்ணிக்கை அடிப்படையில், 230 தொகுதிகளைக் கொண்ட மத்தியப்பிரதேச மாநிலத்தில், காங்கிரஸ் 114 இடங்களில் வெற்றி பெற்றுள்ளது. பாஜக 109 இடங்களிலும், சுயேட்சைகள் 4 இடங்களிலும், பகுஜன் சமாஜ் கட்சி 2 இடங்களிலும், சமாஜ்வாதி ஒரு இடத்திலும் வெற்றி பெற்றுள்ளன. இங்கு யாருக்கும் பெரும்பான்மை இல்லை.

ஏற்கனவே சமாஜ்வாதி கட்சி காங்கிரஸ் கட்சிக்கு ஆதரவு கொடுத்துள்ளது. இதைத் தொடர்ந்து பகுஜன் சமாஜ்வாதி கட்சியின் தலைவர் மாயாவதியும், ம.பி., காங்கிரஸ் ஆட்சியமைக்க ஆதரவு தருவதாக அறிவித்துள்ளார். மேலும், தேவைப்பட்டால், ராஜஸ்தான் மாநிலத்திலும் காங்கிரஸ் கட்சிக்கு ஆதரவு கொடுக்கவும் தயார் என்று கூறியுள்ளார். இந்த இரு கட்சிகள் ஆதரவைத் தொடர்ந்து, மத்தியப்பிரதேச மாநிலத்தில் காங்கிரஸ் கட்சி ஆட்சியமைக்க ஆளுநர் அழைப்பு விடுத்துள்ளார். இதையடுத்து இன்று பிற்பகல் 12 மணிக்கு காங்கிரஸ் தலைவர்கள் ஆளுநரை சந்திக்கின்றனர்.



மத்தியப்பிரதேச மாநிலத்தில் தேர்தல் முடிவுகளில் பாஜக பின்னடைவை சந்தித்தாலும், வாக்குகளின் அடிப்படையில் முன்னிலை பெற்றுள்ளது. ஒட்டு மொத்தமாக பாஜக 41 சதவீதம் (1,56,42,980) வாக்குகளும், காங்கிரஸ் 40.9 சதவீதம் (1,55,95,153) வாக்குகளும் பெற்றுள்ளது. இந்த இரு கட்சிகளுக்கும் இடையிலான வாக்குகளின் வித்தியாசம் 47,827 மட்டுமே என்பது குறிப்பிடத்தக்கது.