ஸ்மார்ட் சிட்டி பட்டியலில் திருப்பூர், திருநெல்வேலி, தூத்துக்குடி, திருச்சி நகரங்கள்!!

மத்திய அரசின் ஸ்மார்ட் சிட்டி பட்டியலில் திருப்பூர், திருநெல்வேலி, தூத்துக்குடி, திருச்சி ஆகிய 4 நகரங்கள் இடம் பெற்றுள்ளன.

பிரதமர் நரேந்திர மோடியின் கனவு திட்டங்களில் ஒன்று ஸ்மார்ட் சிட்டி. இந்தத் திட்டத்தின் கீழ் தேர்ந்தெடுக்கப்படும் நகரங்கள் வளர்ந்த நாடுளில் உள்ள நகரங்களைப் போன்று அனைத்து ஹை டெக் வசதிகளுடன் மேம்படுத்தப்படும். உலகத் தரம் வாய்ந்த கட்டிடங்கள் காட்டப்படும். இந்த நகரங்களின் வாழ்க்கைத் தரம், சர்வதேச நகரங்களுடன் ஒப்பிடும் வகையில் இருக்கும். சுத்தமான குடிநீர், தடையற்ற மின்சாரம், பளபளக்கும் சாலைகள், தரமான போக்குவரத்து என அனைத்து வசதிகளும் இருக்கும்.

ஏற்கனவே ஸ்மார்ட் சிட்டி நகரங்கள் அறிவிக்கப்பட்ட நிலையில் இன்று மத்திய நகர்ப்புற வளர்ச்சித்துறை அமைச்சர் வெங்கையா நாயுடு மீண்டும் ஒரு பட்டியலை வெளியிட்டார். இந்தப் பட்டியலில் இடம் பெற்றுள்ள மொத்தம் 30 நகரங்களில் முதலில் திருவனந்தபுரம், 2வது நயா ராய்பூர் இடம் பெற்றுள்ளன. இந்தப் பட்டியலில் தமிழத்தில் இருந்து திருப்பூர், திருநெல்வேலி, தூத்துக்குடி, திருச்சி ஆகிய 4 நகரங்கள் இடம் பெற்றுள்ளன. ​ இந்தப் பட்டியலில் புதுச்சேரியும் இடம் பெற்றுள்ளது.

பெரிதும் எதிர்ப்பார்க்கப்பட்ட சோனியா காந்தியின் ரா பரேலி தொகுதி இடம் பெறவில்லை. மீரட் நகரமும் இடம் பெறவில்லை. ஜம்மு காஷ்மீரில் இருந்து ஸ்ரீநகர், ஜம்மு இரண்டும் இடம் பெற்றுள்ளன.

ஸ்மார்ட் சிட்டியாக தேர்வு செய்ய 40 நகரங்கள் தேர்வு செய்யப்பட இருந்த நிலையில் 45 நகரங்கள் விண்ணப்பித்து இருந்தன. இவற்றில் 30 மட்டுமே தேர்வு செய்யப்பட்டன. இந்த நகரங்களின் திட்டத்திற்கு ரூ. 57,393 கோடி ஒதுக்கப்படுகிறது. இந்த நகரங்களுடன் சேர்த்து மொத்தம் 90 நகரங்கள் ஸ்மார்ட் நகர திட்டத்தின் கீழ் கொண்டு வரப்பட்டுள்ளது. இதற்கு என்று மொத்தம் ரூ. 1,91,155 கோடி முதலீடு செய்யப்படுகிறது.

Govt announces 30 Smart Cities, Thiruvanathapuram tops list