ஜிஎஸ்டி : உணவு தானியங்களுக்கு வரி விலக்கு!

நாடு முழுவதும் அமல்படுத்தப்பட உள்ள சரக்கு மற்றும் சேவை வரி (ஜிஎஸ்டி) முறையில் உணவு தானியங்களுக்கு முழு வரிவிலக்கு என்று மத்திய அரசு அறிவித்துள்ளது.

மத்திய அரசானது நாடு முழுவதும் ஒரே வரிவிதிப்பு முறை எனும் நோக்கில் ஜிஎஸ்டி வரிவிதிப்பு முறையை அறிமுகப்படுத்த உள்ளது. அதன்படி உணவு தானியங்களுக்கு வரி வசூல் செய்யப்படாது என அறிவிக்கப்பட்டுள்ளது. மிட்டாய், சமையல் எண்ணெய், சர்க்கரை, டீ, காபி மற்றும் நிலக்கரிக்கு 5 சதவீத வரி விதிக்கப்படும். ஹேர் ஆயில், டூத் பேஸ்ட் மற்றும் சோப்புகளுக்கு 18 சதவீத வரியாகும்.

அதே போல் சிறிய கார்களுக்கு 28 சதவீத வரியும், சொகுசு கார்களுக்கு ஏற்கனவே உள்ள வரி உடன் 15 சதவீத வரியும் வசூலிக்கப்படும். மேலும் நுகர்வோர் பயன்பெறும் வகையில் ஏசி, பிரிட்ஜ் ஆகியவற்றின் விலை குறையும் என்றும் எதிர்பார்க்கப்படுகிறது.

எந்த பொருளின் விலையும் உயராது என்றும், பெரும்பாலான பொருட்களின் விலை குறையும் என்றும் மத்திய நிதி அமைச்சர் அருண் ஜெட்லி கூறியிருக்கிறார். ஜிஎஸ்டி அறிமுகப்படுத்தப்பட்ட பின்னர் பணவீக்கம் ஏற்படாது என்றும் அவர் கூறியுள்ளார்.