ஸ்கூலுக்கு போன பிறகு கொரோனா அறிகுறிகள் வந்தால் என்ன செய்வது? - வழிகாட்டுதல்கள் இதோ!

நாடு முழுவதும் கொரோனா வைரஸ் பரவலைத் தடுக்கும் வகையில் பள்ளி, கல்லூரிகள் மூடப்பட்டுள்ளன. இந்த சூழலில் நான்காம் கட்ட ஊரடங்கில் பள்ளிகள் திறப்பு குறித்து முக்கிய அம்சம் இடம்பெற்றிருந்தது. அதாவது 9 முதல் 12ஆம் வகுப்பு வரையிலான மாணவர்கள் வரும் 21ஆம் தேதி முதல் பள்ளிகளுக்குச் சென்று ஆசிரியர்களிடம் ஆலோசனைகளைப் பெறலாம் என்று மத்திய அரசு தெரிவித்திருந்தது. இதுதொடர்பான விரிவான வழிகாட்டு நெறிமுறைகளை மத்திய அரசு நேற்று வெளியிட்டுள்ளது.

அதில், மாணவர்கள்/ ஆசிரியர்கள்/ பள்ளியில் பணியாற்றும் ஊழியர்களுக்கு கொரோனா வைரஸ் பாதிப்பிற்கான அறிகுறிகள் சளி, காய்ச்சல், சுவாசிப்பதில் சிரமம் உள்ளிட்டவை இருந்தால் என்ன செய்வது என்று தெளிவாக குறிப்பிடப்பட்டுள்ளது. அதன்படி,

* சம்பந்தப்பட்ட நபரை தனி அறையில் அமர வைக்க வேண்டும். அல்லது மற்றவர்களிடம் இருந்து தனிமைப்படுத்திக் கொள்ளும் வகையிலான இடத்தில் அமர வைக்க வேண்டும்.

* உடனே பெற்றோர்கள்/ பாதுகாவலர்களுக்கு தகவல் தெரிவிக்க வேண்டும்.

* தனிமையில் இருந்தாலும் முகக்கவசம் தொடர்ந்து அணிந்திருக்க வேண்டும். மருத்துவர்கள் வரும் வரை அப்படியே தொடர வேண்டும்.

பள்ளிகள் திறக்கும் முன், திறந்த பிறகு செய்ய வேண்டிய விஷயங்கள் என்னென்ன?

* அருகிலுள்ள மருத்துவமனை/ கிளினிக்குகள் அல்லது மாநில/ மாவட்ட உதவி எண்ணிற்கு தகவல் தெரிவிக்க வேண்டும்.

* பொது சுகாதாரத்துறை அதிகாரி மூலம் சம்பந்தப்பட்ட நபருக்கு இருக்கும் பாதிப்பின் தீவிரம் கண்டறியப்பட வேண்டும். அதற்கேற்ப அவருடன் தொடர்பில் இருந்தவர்களைக் கண்டறிதல், பாதிப்பிற்கு ஏற்ப சிகிச்சை அளித்தல் உள்ளிட்ட வேலைகளைச் செய்ய வேண்டும்.

* ஒருவேளை அறிகுறிகள் தென்பட்ட நபருக்கு வைரஸ் தொற்று இருப்பது உறுதி செய்யப்பட்டால், அவர் இருந்த இடங்களை கிருமிநாசினி கொண்டு தூய்மைப்படுத்த வேண்டும்.