குஜராத் பாஜவில் குளறுபடி: நிதினுக்கு நிதித்துறை ஒதுக்கீடு?

கட்சிக்குள் நடைபெற்ற பிரச்னையில் வெற்றி கண்ட குஜராத் துணை முதல்வர் நிதின் படேல் நிதியமைச்சர் பதவியைப் பெற்றுள்ளார்.

குஜராத் மாநிலதில் பாஜக ஆறாவது முறையாக ஆட்சி அமைத்துள்ளது. முதல்வராக விஜய் ரூபானியும் துணை முதல்வராக நிதின் படேலும் பதவி ஏற்றுள்ளனர்.

அமைச்சர்களுக்கான துறை ஒதுக்கீட்டில் துணை முதல்வர் நிதின் படேலுக்கு சாலை மற்றும் கட்டிடங்கள், சுகாதாரம் மற்றும் குடும்ப நலம், மருத்துவ கல்வி, நர்மதா–கல்பசார் திட்டம் ஆகிய துறைகள் ஒதுக்கப்பட்டன. முந்தய அரசில் நிதி, நகர்ப்புற மேம்பாடு ஆகிய முக்கிய துறைகளை கவனித்த நிதினுக்கு அத்துறைகள் ஒதுக்கப்படாதது உட்கட்சிப் பூசலைக் கிளப்பியது.

நிதித்துறை சவுரவ் படேலுக்கும் நகர்ப்புற மேம்பாட்டு துறையை முதல்வர் விஜய் ரூபானிக்கும் ஒதுக்கப்பட்டுவிட்டது. இதனால், அதிருப்தி அடைந்த நிதின் படேல் தனக்கு ஒதுக்கப்பட்ட துறைகள் மாற்றப்படாவிட்டால் பதவியை ராஜினாமா செய்வேன் என்று பாஜக தேசியத் தலைவர் அமித் ஷாவிடம் கூறியிருக்கிறார்.

கட்சித் தலைமையில் நடைபெற்ற பேச்சுவார்த்தைக்குப் பிறகு நிதித்துறையை நிதின் வசமே ஒப்படைக்க முடிவுசெய்யப்பட்டுள்ளது என்று தகவல் வெளியாகியுள்ளது.