பாஜக எம்.பி. அலுவலகம் முன் துப்பாக்கிச் சூடு... டெல்லியில் பரபரப்பு

பாஜக எம்.பி.யான ஹன்ஸ் ராஜ் ஹன்ஸின் அலுவலகம், புது டெல்லி, ரோகிணி பகுதியில் அமைந்துள்ளது. இந்த அலுவலகத்துக்கு இன்றிரவு ஒரு நபர் காரில் வந்து இறங்கினார்.

வெள்ளை நிற குர்தாவும், காவி நிறத்தி்ல் ஜிப்பாவும் அணிந்திருந்த அந்த நபர், அலுவலகத்துக்கு முன் நின்று, கையில் தான் வைத்திருந்த துப்பாக்கியால் வானத்தை நோக்கி இரண்டு முறை சுட்டுவிட்டு, கோபத்தில் கத்தியவாறே மீண்டும் காரில் புறப்பட அந்த நபர் தயாரானார்.

ராமேஸ்வர் பெஹல்வான் என்ற அந்த நபர், எம்.பி.யை காண அப்பாயிண்ட்மென்ட் வாங்கியிருந்ததாகவும், அதன்படி அவரை காண முடியாததால் ஆத்திரத்தில் துப்பாக்கியால் சுட்டதாக தெரிகிறது.மேலும், அவர் குடிபோதையில் கார் ஓட்டி வந்ததாகவும் தெரிய வந்துள்ளது.

இரவு நேரம் என்பதால், எம்.பி. அலுவலகம் மூடியிருந்ததால், இந்த துப்பாக்கிச் சூட்டில் யாருக்கு காயம் ஏற்படவில்லை.

இந்தச் சம்பவம் குறித்து ரோகிணி பகுதி போலீஸார் தீவிர விசாரணை மேற்கொண்டு வருகின்றனர்.
எம்.பி. அலுவலகம் முன் துப்பாக்கிச் சூடு நடத்திய ராமேஸ்வர் பெஹல்வான், சுவாமி சர்தானந்த் கல்லூரி மல்யுத்த பயிற்சியாளராக பணிபுரிந்து வருகிறார் என்பது குறிப்பிடத்தக்கது.