ஹைதராபாத் நகரை புரட்டிப்போட்ட பேய் மழை!

ஹைதராபாத் : திடீரென பெய்த கனமழை மற்றும் ஆலங்கட்டி மழையால் மக்களின் இயல்பு வாழக்கை பாதிக்கப்பட்டுள்ளது. மேலும் நகரம் பெரும் சேதத்தை சந்தித்துள்ளது. பெரும் பகுதிகளில் ஆலங்கட்டி மழை அதிகமாக பொழிந்துள்ளது.

பலத்த காற்று அடித்ததால் பெரும்பாலான இடங்களில் மரங்கள் வேருடன் சாய்ந்துள்ளன. இதனால் கடுமையான போக்குவரத்து பாதிப்பு ஏற்பட்டது. அதே போல் பல இடங்களில் தொலைபேசி மற்றும் மின்சார இணைப்புகள் துண்டிக்கப்பட்டுள்ளன. நேற்று மாலை திடீரென கனமழை பொழிய தொடங்கியது. பன்ஜாரா ஹில்ஸ், பேகம்பெட், ஹெடக் சிட்டி, மல்கஜ்கிரி, அமீர்பெட் மற்றும் நம்பள்ளி ஆகிய இடங்களில் சூறைக்காற்றுடன் கூடிய கனமழை பெய்தது.

மழை பெய்யும் போது 100 கிமீ வேகமாக காற்று வீசியதாக வானிலை ஆய்வு மையத்தினர் தெரிவித்துள்ளனர். கடந்த மே மாதம் ஏற்பட்ட மழைப்பொழிவு போன்றே இந்த வருடமும் காற்றுடன் கூடிய மழை பெய்துள்ளது. இந்நிலையில் ஹைதராபாத் மாநகராட்சியானது அவசர குழுக்களை தயார் நிலையில் இருக்கும்படி அறிவுறுத்தியுள்ளது.