திறந்தவெளியில் மலம் கழிக்காத 2-வது மாநிலமாக மாறியது ஹிமாச்சல்

சிம்லா: திறந்தவெளியில் மலம் கழிக்காத இரண்டாவது மாநிலமாக இந்திய அளவில் ஹிமாச்சலப் பிரதேச மாநிலம் உருவெடுத்துள்ளது.

இந்தியாவில் போதிய சுகாதார வசதி இல்லாததால் 63.8 கோடி மக்கள் திறந்தவெளிப் பகுதிகளில் மலம் கழிக்கிறார்கள் என யுனிசெப் அமைப்பு மதிப்பிட்டுள்ளது. உலக அளவில் இது 58 சதவீதம் ஆகும். யுனிசெப்பின் 2008-ஆம் ஆண்டு மதிப்பீட்டின் படி இந்தியாவின் மொத்த மக்கள் தொகையில் 54 சதவீதம் பேர் திறந்த வெளிகளில் மலம் கழிக்கிறார்கள்.

இதனிடையே, தூய்மை இந்தியா திட்டத்தை பிரதமர் நரேந்திர மோடி, கடந்த 2014-ஆம் ஆண்டு அக்டோபர் 2-ம் தேதி தொடங்கி வைத்தார். தூய்மை இந்தியா என்ற நோக்கத்தை அடைவதற்கான இலக்கு வருகிற 2019-ஆம் ஆண்டு அக்டோபர் 2-ம் தேதியாக நிர்ணயிக்கப்பட்டுள்ளது.

தூய்மை இந்தியா’ திட்டத்தின் மூலம் திறந்தவெளியில் மலம் கழிப்பது, குப்பைகள் போடுவதை தவிர்த்து நாட்டை தூய்மையாக வைத்திருக்க வேண்டும் என்ற குறிக்கோளோடு மத்திய அரசு தீவிர பிரசாரம் செய்து வருகிறது. மேலும், திறந்தவெளி கழிப்பிடங்களை தவிர்த்து ஒவ்வொரு வீட்டிலும் கழிவறை கட்டவும், திறந்தவெளி மலம் கழித்தலை போக்கவும், மத்திய அரசு தீவிர விழிப்புணர்வு பிரசாரத்தையும் மேற்கொண்டு வருகிறது.

மொத்தம் 1.04 கோடி வீட்டு கழிவறைகள் கட்டுவது, 2.52 லட்சம் சமூக கழிவறைகள் கட்டுவது மற்றும் 30 கோடி நகர்ப்புற மக்களுக்காக திடக்கழிவு மேலாண்மை திட்டத்துடன் கூடிய 2.54 லட்சம் பொது கழிவறைகள் கட்டுவது என இலக்கு நிர்ணயிக்கப்பட்டுள்ளது.

இந்நிலையில், இந்திய அளவில் திறந்தவெளியில் மலம் கழிக்காத இரண்டாவது மாநிலமாக ஹிமாச்சலப் பிரதேச மாநிலம் உருவெடுத்துள்ளது. ஹிமாச்சல பிரதேச அரசு நிர்ணயித்த காலக்கெடுவை விட ஐந்து மாதத்துக்கு முன்னரே இலக்கை அடைந்ததாக கூறுகிறது. இதற்கு முன்னர், சிக்கிம் மாநிலம் மட்டும் தான் இந்தியாவிலேயே திறந்தவெளி மலம் கழித்தலை போக்கிய ஒரே மாநிலமாக இருந்தது என்பது குறிப்பிடத்தக்கது.

அதேபோல், வருகிற நவம்பர் மாதம் முதல் இந்த பட்டியலில் சேர இலக்கு நிர்ணயித்து கேரள மாநிலம் செய்யப்பட்டு வருகிறது என்பது குறிப்பிடத்தக்கது.
Himachal becomes second in open defecation free state