திருமணம் செய்வதை விட டேட்டிங்கை அதிகம் விரும்பும் இந்தியர்கள்- ஆய்வு முடிவு

இந்தியர்களின் இணையதள பயன்பாடு குறித்து கூகுள் நிறுவனம் சில ஆய்வுகளை நடத்தியது. அதுதொடர்பான முடிவுகள் வெளியான நிலையில், அது பலரையும் ஆச்சர்யமடையச் செய்துள்ளது.

கூகுள் மூலம் தகவல்களை தேடும் இந்தியர்களில், பீட்சா மற்றும் டேட்டிங் தொடர்பான விவரங்களை தேடுபவர்களின் எண்ணிக்கை அதிகமாக உள்ளது. அதன்படி, 2017ம் ஆண்டில் டேட்டிங் தொடர்பான விவரங்களை தேடியவர்களின் எண்ணிக்கை 2018ம் ஆண்டில் 37 சதவீதம் அதிகரித்துள்ளது.

அதன்படி பார்த்தால், இணையதள சேவையை பயன்படுத்தும் இந்தியர்கள் பலரும் டேட்டிங் மற்றும் பீட்சா குறித்த தகவல்களை பெறுவதற்காக உபயோகப்படுத்துவதாக கூகுள் தெரிவித்துள்ளது.

2017ம் ஆண்டுடன் ஒப்பிடும் போது, 2018ம் ஆண்டில் திருமணம் தொடர்பான இணையதளங்களை தேடுதல் 13 சதவீதம் மட்டுமே அதிகரித்துள்ளது. உணவு தேவையை பொறுத்தவரை இந்தியர்கள் பலரும் பீட்சாவையே அதிகம் தேடுவதாகவும் கூறப்பட்டுள்ளது.

அதேபோல, இணையத்தில் தகவல்கள் தேடும் இந்தியர்களில் 10ல் 9 பேர் மாநில மொழிகளை பயன்படுத்தியே விவரங்களை பெறுகின்றனர். தகவல்களை படித்து பார்ப்பதற்கான நிலைமை இருந்தாலும், இணையத்தில் வீடியோவை பார்க்கவே இந்தியர்கள் அதிகம் விரும்புவதாகவும் தெரிவிக்கபப்ட்டுள்ளது.

அதன்படி, இணையத்தை பயன்படுத்தும் இந்தியர்களில் 33 சதவீதத்தினர் பொழுதுப்போக்கு, விளையாட்டு சார்ந்த வீடியோக்களை அதிகம் விரும்புகின்றனர். வாகனம் தொடர்பான தகவல்கள், வணிகம், கல்வி, லைஃப்ஸ்டைல் போன்ற தகவல்களை தேடுவோரின் எண்ணிக்கை கலவையாக உள்ளது.

இதேபோல, ஆன்லைனில் உணவு ஆர்டர் செய்வோரின் எண்ணிக்கையும் கணிசமாக உயர்ந்துள்ளது. குறிப்பாக பெண்களிடம் இந்த போக்கு அதிகரித்துள்ளதாகவும், பலரும் பீட்சாவையே ஆர்டர் செய்து வாங்குவதாகவும் ஆய்வில் கூறப்பட்டுள்ளது.