மேற்கு வங்கத்தில் செல்லுபடியாகுமா அமித் ஷா வியூகம்?

மேற்கு வங்க மாநிலத்திற்கும் 2021இல் சட்டமன்றத் தேர்தல் வரவுள்ள நிலையில் அங்கும் அரசியல் களம் சூடாகி வருகிறது.

ஒவ்வொரு மாநிலத்திலும் தமது கட்சியை வளர்த்தெடுக்க பாஜக தீவிர முயற்சி செய்து வருகிறது. 90 களிலேயே வாஜ்பாய் தலைமையில் பாஜக நாட்டை ஆட்சி செய்திருந்தாலும், தற்போது மோடி தலைமையில் இரண்டு முறை தொடர்ந்து ஆட்சியில் இருந்தாலும், பல மாநிலங்களில் பாஜகவுக்கு சரியான அடித்தளம் இல்லை. வட மாநிலங்களில்கூட இதுதான் நிலைமை என்றுள்ள நிலையில் அதை மாற்றிக்காட்ட அத்தனை வழிகளிலும் முயற்சித்து வருகிறது.

பல மாநிலங்களில் மாநில கட்சிகளுடன் கூட்டணி அமைத்து கால் ஊன்ற முயற்சிக்கிறது. ஆனால் பாஜகவுக்கு நேர் எதிரான இடது சாரி கொள்கைகளைக் கொண்டுள்ள கேரளம், மேற்கு வங்கம் ஆகிய மாநிலங்களிலும் திராவிட கொள்கைகளைக் கொண்டுள்ள தமிழகத்திலும்கூட தனது பலத்தை அதிகரிக்க அனைத்து திட்டங்களையும் முன்னெடுக்கிறது.

'வளர்ச்சியா? வீழ்ச்சியா?': ராகுல் காந்தி கேள்வி

மேற்கு வங்கத்தைப் பொறுத்தவரை கடந்த சட்டமன்றத் தேர்தலில் 294 இடங்களில் 3 இடங்களைப் பிடித்த பாஜக, கடந்த மக்களவைத் தேர்தலில் மொத்தம் உள்ள 42 தொகுதிகளில் 18 தொகுதிகளை தன் வசமாக்கியது. இதனால் தற்போது நடைபெறவுள்ள சட்டமன்றத் தேர்தலில் 200 இடங்களில் வெற்றி பெற வேண்டும் என இலக்கு நிர்ணயித்து செயலாற்றி வருகிறது.

பாஜகவில் தேர்தல் வியூகங்களை சிறப்பாக அமைப்பவராக அறியப்படும் அமித் ஷா சட்டமன்றத் தேர்தல் நடைபெறவுள்ள மாநிலங்களுக்கு சுற்றுப் பயணம் மேற்கொண்டு கள நிலவரங்களை அறிந்து, ஆலோசனைகளை வழங்க உள்ளார். தமிழகத்திற்கு நவம்பர் 21ஆம் தேதி வருகிறார்.

தீபாவளிக்கு எகிறி அடித்த கொரோனா: பீதியில் பொது மக்கள்!

அதேபோல் மேற்கு வங்கத்தில் இந்த முறை ஆட்சியைப் பிடிக்க வேண்டும் என செயல்பட்டு வருவதால், அதற்கு வலு சேர்க்கும் விதமாக அமித் ஷா மாதம் ஒரு முறை மேற்கு வங்கத்துக்கு பயணம் மேற்கொள்ள திட்டமிட்டுள்ளதாக தெரிகிறது. அண்மையில் கொரோனாவில் இருந்து குணமாகி வந்த அமித் ஷா தொடர்ந்து அரசுப் பணிகளையும், கட்சிப் பணிகளையும் கவனித்து வருகிறார். அந்த வகையில் இந்த சுற்றுப் பயண திட்டமும் வகுக்கப்பட்டுள்ளது.