கர்நாடக சட்டமன்ற தேர்தல் வாக்குச்சாவடிக்கு வழிகாட்டும் பயனுள்ள மொபைல் ஆப்!

பெங்களூரு: சட்டமன்ற தேர்தலுக்கு வழிகாட்டும் மொபைல் ஆப் வெளியிடப்பட்டுள்ளது.

வரும் மே 12ஆம் தேதி, கர்நாடக மாநில சட்டமன்ற தேர்தல் நடைபெறவுள்ளது. இதையடுத்து மே 15ஆம் வாக்குகள் எண்ணப்பட்டு, முடிவுகள் அறிவிக்கப்படும்.

இந்நிலையில் தேர்தல் வாக்குச்சாவடிக்கு வழிகாட்டும் ’சுனவனா’(Chunavana) என்ற மொபைல் ஆப்பை கர்நாடக மாநிலம் தலைமை தேர்தல் ஆணையர் சஞ்சிவ் குமார் அறிமுகப்படுத்தியுள்ளார்.

இதன்மூலம் ஒவ்வொரு தொகுதியிலும் போட்டியிடும் வேட்பாளர்கள் குறித்த தகவலை அறிந்து கொள்ளலாம். மேலும் மாநிலம் முழுவதும் உள்ள 56,696 வாக்குச்சாவடிகளை கண்டறியலாம்.

தங்கள் வாக்காளர் அடையாள அட்டை எண்ணை பதிவு செய்து, வாக்களிக்க வேண்டிய வாக்குச்சாவடிக்கு செல்லும் வழி, சம்பந்தப்பட்ட தேர்தல் அதிகாரிகள், அருகேவுள்ள காவல் நிலையம், சுகாதார நிலையம் ஆகிய தகவல்களை அறிந்து கொள்ளலாம்.

மேலும் மூத்த குடிமக்கள் மற்றும் மாற்றுத்திறனாளிகள் வாக்களிக்க வசதியாக சக்கர நாற்காலியை புக் செய்து கொள்ளலாம்.

இந்த மொபைல் ஆப் தேர்தலுக்காக மட்டுமல்லாமல், எல்லா நேரங்களிலும் புதிய வாக்காளர்கள் பெயர் பதிவிற்காகவும் பயன்படுத்திக் கொள்ளலாம். மன அழுத்தத்தில் உள்ளவர்கள் காவல் நிலையம், சுகாதார நிலையம் முகவரியையும் உபயோகித்துக் கொள்ளலாம்.

தேர்தல் அதிகாரிகளின் தகவல்களை பகிர்ந்து கொள்வதன் மூலம், வெளிப்படையாக தேர்தல் நடவடிக்கையை உறுதி செய்ய முயற்சிக்கிறது.

இந்த மொபைல் ஆப்பை வாக்காளர்கள் அனைவரும் பதிவிறக்கம் செய்து, பயன்படுத்திக் கொள்ள அறிவுறுத்தப்பட்டுள்ளது.

Karnataka election 2018 This app will guide you to polling booth.