கேரள பட்ஜெட் களவு? பேஸ்புக்கில் முன்கூட்டிய வெளியானதாகக் குற்றச்சாட்டு

திருவனந்தபுரம்: கேரள மாநில சட்டப்பேரவையில் இன்று தாக்கல் செய்யப்பட்ட பொது பட்ஜெட் சமூக வலைத்தளங்களில் முன்கூட்டியே வெளியானதாக எதிர்க்கட்சிகள் குற்றம்சாட்டியுள்ளன.

கேரள மாநில சட்டப்பேரவையில் 2017-18ஆம் நிதியாண்டிற்கான பொது பட்ஜெட் இன்று தாக்கல் செய்யப்பட்டது. அம்மாநில முதல்வர் பினராயி விஜயனின் அமைச்சரவையில் நிதியமைச்சராக இருக்கும் தாமஸ் ஐசக் பட்ஜெட் தாக்கல் செய்து பேசினார்.

அப்போது, கேரள அரசின் பட்ஜெட் நகல் ஏற்கெனவே சமூக வலைத்தளங்களில் வெளியாகிவிட்டதாகவும் இதனால் அதன் நம்பகத்தன்மை கேள்விக்குறியதாகியுள்ளதாகவும் எதிர்க்கட்சியினர் குற்றம்சாட்டி அமளியில் ஈடுபட்டனர். இதனையடுத்து, பட்ஜெட் தாக்கலுக்கு எதிர்ப்பு தெரிவித்து எதிர்கட்சியினர் வெளிநடப்பு செய்தனர்.

வெளியேறிய, எதிர்க்கட்சித் தலைவர் ரமேஷ் சென்னிதாலா இணையத்தில் வெளியான பட்ஜெட்டை சட்டப்பேரவை வளாகத்தில் வாசித்துக்காட்டினார்.

மாநில அரசின் பட்ஜெட் சமூக வலைத்தளங்களில் முன்கூட்டியே வெளியானதாக எழுந்துள்ள குற்றச்சாட்டு, பட்ஜெட் பிரதிகள் களவு போயிருக்கலாம் என்ற சந்தேகத்தையும் ஏற்படுத்தியுள்ளது.