மருத்துவ சிகிச்சைக்காக அமெரிக்கா சென்ற கேரள முதல்வர்!

கேரள முதலமைச்சர் பினராயி விஜயன், உடல்நல சிகிச்சைக்காக தனது மனைவியுடன் இன்று அமெரிக்கா புறப்பட்டு சென்றார்.

உடல்நலக் குறைவால் பாதிக்கப்பட்ட கேரள முதலமைச்சர் பினராயி விஜயன், கடந்த மார்ச் 3ஆம் தேதி சென்னை அப்போலோ மருத்துவமனையில் அனுமதிக்கப்பட்டார். பின்னர் அமெரிக்காவின் மின்னெசோட்டா மாநிலத்தில் உள்ள மேயோ கிளினிக் மருத்துவமனையில் சிறப்பு சிகிச்சை பெறுவதற்காக சென்னை மருத்துவர்கள் அவரை பரிந்துரைத்திருந்தனர்.

இதற்காக கடந்த மாதம் 19-ஆம் தேதி முதல்வர் பினராயி விஜயன் அமெரிக்கா செல்ல இருந்தார். ஆனால் அந்த சமயத்தில் கேரளாவில் பெய்த வரலாறு காணாத மழை மற்றும் வெள்ளம் காரணமாக பினராயி விஜயனின் அமெரிக்கா பயணம் ஒத்தி வைக்கப்பட்டது.

இந்நிலையில், தற்போது கேரளாவில் மீண்டும் இயல்பு நிலை திரும்பி வருவதையடுத்து, முதல்வர் பினராயி விஜயன் செப்டம்பர் 3ஆம் தேதி, அமெரிக்கா செல்வதாக அறிவிக்கப்பட்டிருந்தது. இதை முன்னிட்டு கேரள கவர்னரை நேற்று சந்தித்த பினராயி விஜயன், மாநிலத்தில் நடைபெற்று வரும் நிவாரணம் மற்றும் மறுசீரமைப்பு பணிகள் தொடர்பாக அவருடன் ஆலோசனை நடத்தினார்.

இந்நிலையில், அறிவிக்கப்பட்ட தேதிக்கு ஒருநாள் முன்னதாகவே முதல்வர் பினராயி விஜயன், தனது மனைவியுடன் இன்று அமெரிக்கா புறப்பட்டு சென்றார். அவர் திரும்பி வரும்வரை அவரது இலாகா பொறுப்புகளை தொழிற்சாலைகள் துறை மந்திரி இ.பி. ஜெயராஜன் கவனித்து கொள்வார் என தெரிவிக்கப்பட்டுள்ளது.