Kumaraswamy: புதிய கர்நாடக அரசில் யாருக்கு எந்த பதவி?

புதிதாக பதவி ஏற்க உள்ள குமாரசாமி தலைமையிலான கர்நாடக அமைச்சரவையில் யாருக்கு எந்தப் பதவி வழங்குவது என்பது குறித்து இன்று தெரியவரும் என்று எதிர்பார்க்கப்படுகிறது.

கர்நாடக மாநில சட்டப்பேரவைத் தேர்தலில் அதிக வாக்குகள் பெற்ற தனிப்பெரும் கட்சியாக பாஜக உருவெடுத்துள்ளது. இருப்பினும், 104 தொகுதிகளில் மட்டுமே வெற்றிபெற்றதால் பெரும்பான்மைக்குத் தேவையான மேலும் 7 எம்எல்ஏக்கள் ஆதரவு கிடைக்கவில்லை. இதனால், எடியூரப்பா நம்பிக்கை வாக்கெடுப்பை சந்திக்காமலே பதவி விலகியுள்ளார்.

இதனையடுத்து 78 தொகுதிகளைக் கைப்பற்றிய காங்கிரஸ் 37 தொகுதிகளை வென்றிருக்கும் மதச்சார்பற்ற ஜனதா தளத்துடன் கூட்டணி ஆட்சி அமைக்க உள்ளது.

மஜத கட்சியின் மாநில தலைவர் குமாரசாமியை புதன்கிழமை முதல்வராக பதவியேற்க கர்நாடக ஆளுநர் வஜூபாய் வாலா அழைப்பு விடுத்துள்ளார். இந்நிலையில் இன்று டெல்லி செல்லும் குமாரசாமி காங்கிரஸ் கட்சியின் தேசியத் தலைவர்களைச் சந்தித்து அமைச்சரவையில் யாருக்கு எந்த பதவியை ஒதுக்கீடு செய்வது என்பது குறித்து ஆலோசிக்க உள்ளதாகத் தெரிகிறது.

கர்நாடக மாநிலத்தின் 24வது முதல்வராக மதச்சார்பற்ற ஜனதா தளத்தின் தலைவர் குமாரசாமி புதன்கிழமை (நாளை மறுநாள்) பதவியேற்கவுள்ளார்.