மறைந்த முன்னாள் முதல்வர் ஜானகிராமன் உடலுக்கு மு.க.ஸ்டாலின் நேரில் அஞ்சலி!

விழுப்புரம் மாவட்டம் ஆலத்தூரில் பிறந்து, திமுக தலைவர் கருணாநிதியிடம் பணியாற்றும் வாய்ப்பை பெற்றார். பின்னர் புதுச்சேரியில் தொழில் தொடங்கி, கழக பணிகளில் துணை நின்று செயல்பட்டவர்.

இதையடுத்து 1988ஆம் ஆண்டு புதுச்சேரி மாநில பொருளாளராக பொறுப்பேற்றார். 1985ல் நெல்லித்தோப்பு தொகுதியில் வெற்றி பெற்று, சட்டசபைக்கு சென்றார். 1996ஆம் ஆண்டு சட்டமன்ற தேர்தலில் சிறப்பான வெற்றி பெற்று, ஆட்சி அமைத்தார்.

குறைந்த காலமே ஆட்சியில் இருந்தாலும், புதுச்சேரி மாநில வளர்ச்சிக்கு ஏராளமான நலத்திட்டங்களைக் கொண்டு வந்துள்ளார். இந்நிலையில் உடல்நலக்குறைவு காரணமாக, ஜானகிராமன் நேற்று உயிரிழந்தார்.

அவரது உடல் புதுச்சேரி ஆம்பூர் சாலையில் உள்ள வீட்டில் அஞ்சலிக்காக வைக்கப்பட்டது. அப்போது திமுக தலைவர் மு.க.ஸ்டாலின், புதுச்சேரி மாநில முதலமைச்சர் நாராயணசாமி உள்ளிட்டோர் நேரில் சென்று அஞ்சலி செலுத்தினர்.

இதனைத் தொடர்ந்து இன்று காலை 8 மணி அளவில் ஜானகிராமன் சொந்த ஊரான ஆலத்தூரில், அரசு மரியாதை உடன் 21 குண்டுகள் முழங்க அடக்கம் செய்யப்பட்டது.