டெல்லி மாநகராட்சி தோல்வி எதிரொலி: அஜய் மக்கான் ராஜினாமா

டெல்லி: டெல்லி மாநகராட்சி தேர்தலில் காங்கிரஸ் கட்சி தோல்வியடைந்ததற்கு தார்மீக பொறுப்பேற்று தனது டெல்லி காங்கிரஸ் கட்சித் தலைவர் பதவியை ராஜினாமா செய்வதாக அஜய் மக்கான் அறிவித்துள்ளார்.

டெல்லியில் ஆம் ஆத்மி அரசு அமைந்துள்ள நிலையில், அம் மாநகராட்சிக்கான தேர்தல் கடந்த 23-ம் தேதி நடைபெற்றது. வடக்கு டெல்லியில் உள்ள 104 வார்டுகள், தெற்கு டெல்லியில் உள்ள 104 வார்டுகள், கிழக்கு டெல்லியில் உள்ள 64 வார்டுகள் என மொத்தம் 272 வார்டுகளுக்கான தேர்தலில் சுமார் 2,500-க்கும் மேற்பட்ட வேட்பாளர்கள் களம் கண்டனர். ஆனால், இரண்டு வார்டுகளில் வேட்பாளர்கள் மரணமடைந்ததால், அந்த வார்டுகளுக்கான வாக்குப்பதிவு வருகிற மே மாதம் 14 மற்றும் 21-ம் தேதிகளுக்கு தள்ளி வைக்கப்பட்டுள்ளதால், 270 வார்டுகளுக்கு மட்டும் வாக்குப்பதிவு நடைபெற்றது.

பாஜக, காங்கிரஸ், ஆம் ஆத்மி என மும்முனை போட்டி நிலவிய டெல்லி மாநகராட்சி தேர்தலில் பதிவான வாக்குகளின் எண்ணிக்கை இன்று எண்ணப்பட்டு முடிவுகள் அறிவிக்கப்பட்டன. அதில், 184 வார்டுகளை கைப்பற்றி பாஜக அமோக வெற்றி பெற்றது. 46 வார்டுகளில் வெற்றி பெற்று ஆம் ஆத்மி இரண்டாமிடதுக்கும், 30 வார்டுகளில் வெற்றி பெற்று காங்கிரஸ் கட்சி மூன்றாமிடத்துக்கும் தள்ளப்பட்டது.

தேர்தல் முடிவுகளில், 50 வார்டுகளில் கூட வெற்றி பெற இயலாததால் காங்கிரஸ் கட்சி கடும் அதிர்ச்சிக்குள்ளாகியுள்ளது. இந்நிலையில், டெல்லி மாநகராட்சி தேர்தலில் காங்கிரஸ் கட்சி தோல்வியடைந்ததற்கு பொறுப்பேற்று, தனது டெல்லி காங்கிரஸ் கட்சித் தலைவர் பதவியை ராஜினாமா செய்வதாக அஜய் மக்கான் அறிவித்துள்ளார்.
MCD election results 2017: Congress routed, Ajay Maken resigns as party’s Delhi chief