''மினி பாகிஸ்தான்'' என்று கூறவில்லை: மேற்குவங்க அமைச்சர் விளக்கம்

''நான் கூறியதை பத்திரிகைகளில் திருத்திக் கூறியுள்ளனர். நான் மினி பாகிஸ்தான் என்று கூறவில்லை'' என்று மேற்குவங்க அமைச்சர் பிர்ஹத் ஹக்கீம் விளக்கம் அளித்துள்ளார்.

மேற்குவங்க மாநிலத்தில் முக்கிய அமைச்சராக மற்றும் முதல்வர் மம்தாவுக்கு நெருக்கமானவராக கருதப்படுபவர் பிரஹத் ஹக்கீம். இவர் இம்முறை கொல்கத்தா துறைமுகத் தொகுதியில் இருந்து போட்டியிடுகிறார்.

இவர் நேற்று பாகிஸ்தானின் ''தி டான்'' பத்திரிக்கைக்கு பேட்டி அளித்தார். இந்தப் பத்திரிகை சார்பில் பேட்டி எடுக்க வந்திருந்த மலீஹா ஹமித் சித்திக் என்பவரை தன்னுடன் அழைத்து செல்லும்போது, ''வாருங்கள். உங்களை நான் மினி பாகிஸ்தானுக்கு அழைத்துச் செல்கிறேன்'' என்று தெரிவித்துள்ளார். இந்த செய்தி பாகிஸ்தானின் அந்தப் பத்திரிக்கையின் இணைய தளத்தில் வெளியாகி சில மணி நேரங்களில் அதிகளவில் லைக்ஸ் பெற்றுள்ளது.

இந்நிலையில், இந்தியாவில் பல்வேறு அரசியல் கட்சிகளும் அவரது பேச்சுக்கு எதிர்ப்பு தெரிவித்தன. அவரை திரிணமூல் கட்சியில் இருந்து நீக்க வேண்டும் என்று பாஜக கோரிக்கை வைத்துள்ளது.

இதற்கிடையே இன்று இதற்கு விளக்கம் அளித்துள்ள அமைச்சர் ஹக்கீம், ''நான் அவ்வாறு கூறவில்லை. நான் முஸ்லிம் என்பதால் என் பேச்சை திரித்து வெளியிட்டுள்ளனர். மோடி பாகிஸ்தான் சென்றால் அது செய்தி அல்ல. ஆனால், நான் ஏதாவது சொன்னால் அது பெரிய பிரச்சனை ஆகிவிடும் என்றுதான் கூறினேன்'' என்று விளக்கம் அளித்துள்ளார்.