இனோவா வேண்டாம், ஃபார்ச்சூனர் வேணும்: அடம் பிடிக்கும் அமைச்சர்

கர்நாடக மாநிலத்தில் காங்கிரஸ் கட்சியைச் சேர்ந்த அமைச்சர் ஜமீர் அகமது கான் தனக்கு இனோவா காருக்குப் பதில் ஃபார்ச்சூனர் காரைத் தருமாறு கோரியுள்ளார்.

கர்நாடக மாநிலத்தில் மதஜ தலைவர் குமாரசாமி தலைமையிலான மதஜ – காங்கிரஸ் கூட்டணி ஆட்சி நடக்கிறது. அம்மாநில உணவுத்துறை அமைச்சராக அண்மையில் பதவியேற்ற ஜமீர் அகமது கான் தனக்கு டொயோட்டா ஃபார்ச்சூனர் கார்தான் வேண்டும் என்று கேட்டிருக்கிறார்.

அமைச்சர்களுக்கான வாகனங்களை வழங்கும் போது அவருக்கு டொயோட்டா இனோவா கார் ஒதுக்கப்பட்டது. அந்தக் காருக்குப் பதிலாக டொயோட்டா ஃபார்ச்சூனர் காரைத் தர வேண்டும் என்று அவர் வலியுறுத்தியுள்ளார். “நான் சிறுவயது முதலே பெரிய கார்களில் பயணித்தவன். இனோவா போன்ற சிறிய காரில் வசதியாக பயணிக்க முடியவில்லை” என்று அவர் கூறியுள்ளார்.

முன்னாள் முதல்வர் சித்தராமையா பயன்படுத்திய ஃபார்ச்சூனர் கார் உட்பட சில கார்கள் இன்னும் எந்த அமைச்சர்களுக்கும் ஒதுக்கப்படவில்லை என்றும் தெரிவிக்கும் அவர் சித்தராமையா வைத்திருந்த ஃபார்ச்சூனர் காரை தனக்குத் தந்துவிடுமாறு கேட்கிறார். இது எதிர்க்கட்சியான பாஜகவினரின் விமர்சனத்துக்கு வழிவகுத்துள்ளது.