37 கோடி வங்கிக் கணக்குகள், 11 கோடி கழிப்பிடங்கள்... பாஜக அரசின் சாதனைகளை நாடாளுமன்றத்தில் பட்டியலிட்ட பிரதமர்

குடியரசுத்தலைவர் உரைக்கு நன்றி சொல்லும் விதமாக நாடாளுமன்றத்தில் உரையாற்றிய பிரதமர் நரேந்திர மோடி தனது அரசின் சாதனைகளைப் பட்டியலிட்டார்.

சட்டப்பிரிவு 370 ரத்து செய்யப்பட்டது, ராமர் கோயில் கட்டுவதற்கு வழிவகை செய்தது மற்றும் முத்தலாக்கை தடை செய்தது உள்ளிட்ட அரசின் பெரிய முடிவுகள் பலவற்றையும் குறிப்பிட்டு பிரதமர் பேசினார்.

மேலும், இதற்கு முன்பு இருந்த யூபிஏ அரசின் ஆட்சியைப் போல தாங்களும் ஆட்சி செய்திருந்தால் நாடு இன்னும் பல முக்கிய முடிவுகளுக்காக காத்திருக்க வேண்டி வந்திருக்கும்.

அடுத்த தலைமுறை போர் விமானங்கள், முப்படைகளின் தலைமைத் தளபதி நியமனம் ஆகிய முடிவுகள் அவற்றுள் சில என்றும் பிரதமர் தெரிவித்தார்.

ஒரு தனிமனிதனை வளப்படுத்துவதற்கு இந்த அரசு என்னவெல்லாம் முயற்சிகள் மேற்கொண்டிருக்கிறது என்று பட்டியலிடத்தொடங்கினார் பிரதமர்.


சுமார் 37 கோடி வங்கிக்கணக்குகளை உருவாக்கியிருக்கிறோம். 11 கோடி கழிப்பிடங்கள் மற்றும் 13 கோடி சமையல் எரிவாயு இணைப்புகள் கொடுத்திருக்கிறோம். இத்துடன் 2 கோடி புதிய வீடுகள் கொடுத்திருக்கிறோம் என பட்டியலிட்டுப் பேசினார்.