சமஸ்கிருதம் பேசுங்க சர்க்கரை நோய் தீரும் - பா.ஜ.க. எம்.பி. கணேஷ் சிங் கண்டுபிடிப்பு

தினசரி சமஸ்கிருதம் பேசிவந்தால் சர்க்கரை நோய் மற்றும் கொழுப்பு குறையும் என்று பா.ஜ.க. எம்.பி. கணேஷ் சிங் தெரிவித்துள்ளார்.

நாடாளுமன்றத்தில் சமஸ்கிருதப் பல்கலைக்கழகங்கள் மசோதாவின் மீதான விவாதம் நேற்று நடைபெற்றது. விவாதத்தின்போது பேசிய பாஜக எம்.பி கணேஷ் சிங் பேசினார். அப்போது பேசிய அவர், அமெரிக்க கல்வி நிறுவனம் ஒன்றில் நடத்தப்பட்ட ஆய்வின்படி, தினசரி சமஸ்கிருதம் பேசுவது கொழுப்பையும், சர்க்கரை நோயையும் குறைக்கும் என்று முடிவுகள் வெளியாகியுள்ளதாகத் தெரிவித்தார்.

இது சமூக வலைதளங்களில் வைரலாகப் பரவி வருகிறது. ஆனால், கூடுதலாக மேலும் பேசிய அவர், கணினிப் பயன்பாடுகளுக்கான நிரல் எழுதும் மொழியானது ( Programming Languages ) , ஒருவேளை சமஸ்கிருதத்தில் உருவாக்கப்பட்டால், அது குறைபாடுகளற்று இருக்கும் என்று நாசா தெரிவித்துள்ளதாகவும் தெரிவித்தார்.

உலகம் முழுக்க இருக்கும் மொழிகளில் 97 சதவீத மொழிகள் சமஸ்கிருதத்திலிருந்து பிறந்தவையே என்று தெரிவித்த இவர் இதில் சில இஸ்லாமிய மொழிகளும் அடக்கம் என்றும் தெரிவித்தது குறிப்பிடத்தக்கது.

இதே மசோதாவின் மீது பேசிய மத்திய அமைச்சர் பிரதாப் சந்திர சாரங்கி சமஸ்கிருதத்திலேயே பேசினார். மேலும் இது மிகவும் லாவகமான மொழி என்றும் பேசினார்.