புதிய நாடாளுமன்றத்துக்கான கட்டுமான பணிகள் தொடக்கம்!

டெல்லியில் சுமார் 100 ஆண்டுகள் பழமை வாய்ந்த நாடாளுமன்ற கட்டடம் அமைந்துள்ளது. இந்த சூழலில் பிரம்மாண்டமான புதிய நாடாளுமன்றம் கட்டுவதற்கு மத்திய அரசு முடிவு செய்தது. அதன்படி, சென்ட்ரல் விஸ்டா மறுசீரமைப்புத் திட்டத்தின் கீழ் டெல்லியில் புதிய நாடாளுமன்றம் எழுப்பப்பட உள்ளது. 4 மாடிகளைக் கொண்ட இந்த கட்டடம் ரூ.970 கோடி மதிப்பீட்டில் அமையவுள்ளது.

முக்கோண வடிவில் அமையவுள்ள புதிய நாடாளுமன்றத்துக்கான கட்டுமான ஒப்பந்தம் டாடா நிறுவனத்திடம் அளிக்கப்பட்டுள்ளது. 2022ஆம் ஆண்டு இந்தியாவின் 75வது சுதந்திர தினம் கொண்டாடப்படுவதற்கு முன்னர் இந்த கட்டடத்தை கட்டி முடிக்க திட்டமிடப்பட்டுள்ளது.

இதனிடையே, புதிய நாடாளுமன்ற கட்டடத்தை எதிர்த்து பல்வேறு மனுக்கள் உச்ச நீதிமன்றத்தில் தாக்கல் செய்யப்பட்டன. வழக்கை விசாரித்த நீதிமன்றம், விசாரணை முடியும் வரை புதிய கட்டுமானங்கள் கட்டக் கூடாது என்று உத்தரவிட்டது. ஆனால், அடிக்கல் நாட்டு விழாவிற்கு மட்டும் அனுமதி அளித்தது. அதன் தொடர்சியாக, கடந்த டிசம்பா் 10ஆம் தேதி இதற்கு பிரதமர் மோடி அடிக்கல் நாட்டினார்.

உலகின் மிகப்பெரிய கொரோனா தடுப்பூசி செயல்பாடு: இந்தியாவில் நாளை தொடக்கம்!

அதேசமயம், வழக்கு விசாரணையின் போது, புதிய நாடாளுமன்ற கட்டடம் உள்ளிட்டவற்றை அடக்கிய சென்ட்ரல் விஸ்டா திட்டத்துக்கு அனுமதி அளித்தது. ஆனால், நிலத்தை பயன்படுத்துவது தொடா்பாக பாரம்பரியத்தைப் பாதுகாப்பதற்கான குழுவிடம் அனுமதி பெற வேண்டும் என்று உத்தரவிட்டது. இதையடுத்து, புதிய நாடாளுமன்ற கட்டுமானத்தை மேற்கொள்ள 14 உறுப்பினா்களைக் கொண்ட பாரம்பரியத்தைப் பாதுகாப்பதற்கான குழுவும் அனுமதி அளித்தது.

அதனைத் தொடா்ந்து கட்டுமானத் திட்டத்தை மத்திய அரசு துரிதப்படுத்தியது. மேலும், மகர சங்கராந்தி முடிந்து வரும் முதல் நாளில் பணிகளைத் தொடங்க கட்டுமான பணிகளை மேற்கொள்ளும் டாடா திட்ட (Tata Projects Ltd) நிறுவனத்தை மத்திய பொதுப் பணித்துறை கேட்டுக் கொண்டது. அதன்படி, புதிய நாடாளுமன்ற கட்டடத்துக்கான கட்டுமானப் பணிகள் இன்று காலை தொடங்கின. புதிய நாடாளுமன்ற கட்டடத்தின் கட்டுமான பணிகள் தொடங்கப்பட்டுள்ளன என்று மத்திய அரசு அதிகாரி ஒருவர் தெரிவித்துள்ளார்.