பள்ளிக் கல்வி தரவரிசைப் பட்டியல்....கேரளா முதலிடம்... தமிழகத்துக்கு?

பள்ளிக் கல்வியின் தரத்தை மேம்படுத்தும நோக்கில், தேசிய அளவிலான தரவரிசைப் பட்டியலை நீதி ஆயோக் இன்று வெளியிட்டுள்ளது.

ஆசிரியர் -மாணவர் விகிதம், மாணவர்களின் தேர்ச்சி விகிதம், பள்ளிகளின் உள்கட்டமைப்பு வசதி, நிதிகளை திறம்பட கையாளுதல் உள்ளிட்ட பல்வேறு காரணிகளை அடிப்படை கொண்டு இந்தப் பட்டியல் தயாரிக்கப்பட்டுள்ளது.

மேலும், உத்தரப் பிரதேசம், மகாராஷ்டிரா, கேரளா, தமிழகம் உள்ளிட்ட 20 பெரிய மாநிலங்கள், கோவா, சிக்கிம், நாகாலாந்து உள்ளிட்ட 8 சிறிய மாநிலங்கள் மற்றும் டெல்லி, சண்டீகர், புதுச்சேரி உள்ளிட்ட 7 யூனியன் பிரதேசங்கள் என மூன்று விரிவான பிரிவுகளின் கீழ் இத்தரவரிசைப் பட்டியல் வெளியிடப்பட்டுள்ளது.

2015 -16 மற்றும் 2016- 17 கல்வியாண்டுகளில் பள்ளிக் கல்வித் துறையில் பல்வேறு மாநிலங்களின் செயல்பாடுகளை ஒப்பிட்டு இந்த பட்டியல் தயாரிக்கப்பட்டுள்ளது.

இதன்படி, பள்ளிக் கல்வித் துறையில் ஒட்டுமொத்த செயல்பாடுகளின் அடிப்படையில் 2015 -16 ஆம் ஆண்டில் 77.6 சதவீதத்துடன் முதலிடத்தில் இருந்த கேரளா, 2016- 17 ஆம் ஆண்டிலும் 82.2 சதவீதத்துடன் முதலிடத்தை தக்கவைத்து கொண்டுள்ளது.

இதேபோன்று, 63.2 சதவீதத்துடன் இரண்டாமிடத்தில் இருந்த தமிழகம், 73. 4 சதவீதம் புள்ளிகளுடன் இரண்டாம் இடத்தை தக்க வைத்துள்ளது.

அதேசமயம், இப்பட்டியலில் மூன்றாம் இடத்தில் இருந்த மகாராஷ்டிரா ஆறாம் இடத்துக்கும், ஐந்தாம் இடத்தில் இருந்த கர்நாடகா 13 -ஆவது இடத்துக்கும் தள்ளப்பட்டுள்ளன.

மேலும், ஆந்திர பிரதேசம் தரவரிசைப் பட்டியலில் அதே 11 -ஆவது இடத்திலும், ஜம்மு -காஷ்மீர் 16 -ஆவது இடத்திலும் உள்ளன.

தரவரிசைப் பட்டியலில் 18 ஆவது இடத்தில் இருந்த உத்தரப் பிரதேசம் ஒரு படி முன்னேற 17 இடத்தை பிடித்துள்ளது.

பிகார் மற்றும் ஜார்க்கண்ட் மாநிலங்கள் முறையே 19, 20 என, கடைசி இரண்டு இடங்களில் உள்ளன.

யூனியன் பிரதேசங்களை பொறுத்தவரை, சண்டீகர் முதலிடத்திலும், டெல்லி இரண்டாம் இடத்திலும் உள்ளன. இந்த தரவரிசைப் பட்டியலில் புதுச்சேரி நான்காம் இடத்தையே பிடித்துள்ளது.