8 வயதுக்கு கீழ், 60 வயதுக்கு மேல் பாஸ்போர்ட் விண்ணப்பக் கட்டணம் குறைப்பு!!

8 வயதுக்கு குறைந்தவர்கள் மற்றும் 60 வயதுக்கு அதிகமானவர்களுக்கு பாஸ்போர்ட் விண்ணப்பக் கட்டணத்தை குறைத்து இருப்பதாக மத்திய வெளியுறவுத்துறை அமைச்சர் சுஷ்மா ஸ்வராஜ் தெரிவித்துள்ளார்.

பாஸ்போர்ட் சட்டத்தின் (1967) 50ஆம் ஆண்டை முன்னிட்டு நடந்த நிகழ்ச்சியில் சுஷ்மா பேசுகையில், ''முன்பு போல் ஆங்கிலத்தில் மட்டும் இல்லாமல், இனிமேல் பாஸ்போர்ட்டில் இந்தியும் இடம் பெற்றிருக்கும். 8 வயதுக்கு குறைந்தவர்கள் மற்றும் 60 வயதுக்கு அதிகமானவர்களுக்கு பாஸ்போர்ட் விண்ணப்பக் கட்டணத்தில் 10 சதவீதம் குறைக்கப்படும்'' என்றார்.

கடந்த 2016ல் பாஸ்போர்ட் நடைமுறை விதிகளை தளர்த்தி சுஷ்மா உத்தரவு பிறப்பித்து இருந்தார். இதையடுத்து, இன்று இந்த உத்தரவை பிறப்பித்துள்ளார். முந்தைய உத்தரவில், கணவரிடம் இருந்து பிரிந்தவர்கள், கணவனை விவாகரத்து செய்தவர்கள் தங்களது கணவர்களின் பெயர்களை குறிப்பிட வேண்டியது இல்லை. அதேபோல், சாதுக்கள் மற்றும் சந்நியாசிகள் தங்களது பெற்றோரின் பெயருக்குப் பதில் தங்களது குருக்களின் பெயர்களை விண்ணப்பத்தில் குறிப்பிடலாம்.

மேலும், விண்ணப்பிக்கும்போது, பிறந்த தேதிக்கான சான்றிதழை விண்ணப்பிக்க வேண்டியதில்லை. இதற்கு மாறாக பிறந்த தேதி இடம் பெற்றிருக்கும் பான் கார்டு, மெட்ரிக் பள்ளி சான்றிதழ், ஆதார் கார்டு, இ-ஆதார் ஆகியவற்றில் ஏதாவது ஒன்றை சமர்ப்பிக்கலாம். இத்துடன் பணிச் சான்றிதழ், ஓட்டுனர் உரிமம், தேர்தல் அடையாள அட்டை, எல்ஐசி பாலிசி கார்டு ஆகியவற்றில் ஏதாவது ஒன்றின் நகலை சமர்ப்பிக்கலாம்.

Passport application fees reduced for those under 8 years and over 60 years of age: Sushma Swaraj