விசா நடைமுறை: ஆஸி.,பிரதமரிடம் தொலைப்பேசியில் மோடி பேச்சு

டெல்லி: அமெரிக்காவை தொடர்ந்து, தனது விசா நடைமுறையில் மாற்றங்களை கொண்டு வர திட்டமிட்டுள்ள ஆஸ்திரேலிய பிரதமரிடம், பிரதமர் மோடி தொலைப்பேசியில் உரையாடியுள்ளார்.

உள்நாட்டினருக்கு வேலைவாய்ப்பை பெருக்கும் விதத்தில், எச் -1பி விசா நடைமுறையில் அமெரிக்க அதிபர் ட்ரம்ப் அண்மையில் மாற்றங்களை கொண்டு வந்தார். இதனால், அந்நாட்டில் பணிபுரியும் ஏராளமான இந்தியர்கள் வேலை இழக்கும் அபாயகரமான சூழல் ஏற்பட்டுள்ளது.

இதனைத்தொடர்ந்து, உள்நாட்டினருக்கு வேலைவாய்ப்பை பெருக்கும் விதத்தில், ஆஸ்திரேலியாவும் தனது 457 பிரிவு விசா நடைமுறையில் மாற்றங்களை கொண்டு வரத் திட்டமிட்டுள்ளது. இதற்கான அறிவிப்பை அந்நாட்டு பிரதமர் மால்கோம் டர்ன்புல் அண்மையில் அறிவித்தார். திறன் சார்ந்த வேலைகளுக்காக வெளிநாட்டினரை சுமார் நான்கு ஆண்டுகள் வரை பணியர்த்தும், ஆஸ்திரேலியாவின் இந்த 457 பிரிவு விசா மூலம் அங்கு ஏராளமான இந்தியர்கள் பணிபுரிந்து வருகின்றனர்.

ஆஸ்திரேலியாவில் பணிபுரியும் வெளிநாட்டினரில் அதிக அளவில் அதாவது 25 சதவீதம் பேர் இந்தியர்கள் என கூறப்படும் நிலையில், தற்போது, 457 பிரிவு விசா நடைமுறையில் அந்நாட்டு அரசு கொண்டு வரவுள்ள மாற்றத்தால், அங்கு பணிபுரியும் இந்தியர்களுக்கு பெரும் பாதிப்பு ஏற்பட்டுள்ளது.

இத்தகைய சூழலில், ஆஸ்திரேலிய பிரதமரிடம், பிரதமர் மோடி தொலைப்பேசியில் உரையாடியுள்ளார். நீண்ட நேரம் நடைபெற்ற இந்த உரையாடலின் போது, ஆஸ்திரேலிய அரசு கொண்டு வரவுளால் விசா நடைமுறையால் ஏற்படும் பாதிப்புகள் குறித்து அந்நாட்டு பிரதமரிடம், பிரதமர் மோடி விளக்கியதாக தெரிகிறது.

இரு நாட்டு தலைவர்களும் தொலைப்பேசியில் உரையாடியது குறித்த அறிவிப்பை பிரதமர் அலுவலகம் வெளியிட்டுள்ளது. மேலும், இந்த விஷயத்தில் இரு தரப்பு அதிகாரிகளும் நெருக்கமாக தொடர்பில் இருக்க வேண்டும் என இரு நாட்டு தலைவர்களும் ஒப்புக்கொண்டுள்ளதாகவும் பிரதமர் அலுவலகம் வெளியிட்டுள்ள செய்திக் குறிப்பில் தெரிவிக்கப்பட்டுள்ளது.
PM Modi conveys concerns over visa issue to Australian counterpart Malcolm Turnbull