தமிழ் மொழியால் இந்தியாவுக்கு பெருமை- ‘மான் கி பாத்’ நிகழ்ச்சியில் பிரதமர் மோடி பேச்சு!!

பிரதமர் மோடி, மான் கி பாத் நிகழ்ச்சியில் உலகிலேயே மிகவும் பழமையான மொழி தமிழ் மொழி எனவும், தமிழ் மொழியால் இந்தியாவுக்கு பெருமை எனவும் தெரிவித்துள்ளார்.

பிரதமர் மோடி, மாதந்தோறும் அகில இந்திய வானொலியில் ‘மான் கி பாத்’ நிகழ்ச்சியின் மூலம், மக்களுடன் உரையாடி வருகிறார். அந்த வகையில், இந்த மாதத்திற்கான நிகழ்ச்சி இன்று ஒலிபரப்பப்பட்டது. அப்போது பேசிய பிரதமர் மோடி, இந்தியா சார்பாக 2018 ஆசிய விளையாட்டுப் போட்டிகளில் பங்கேற்றுள்ள வீரர் வீராங்கனைகளுக்கு வாழ்த்து தெரிவித்தார். மேலும், ரக்ஷா பந்தன் திருவிழாவிற்கு அனைவருக்கு வாழ்த்து தெரிவித்தார்.

தொடர்ந்து பேசிய அவர், கேரளா வெள்ளப்பாதிப்பில் உயிரைப் பணயம் வைத்து மீட்புப் பணியில் ஈடுபட்ட விமானப் படை, இராணுவம் உள்ளிட்ட அனைத்து துறை பாதுகாப்புப் படை வீரர்களுக்கு பாராட்டுகளையும் தெரிவித்தார்.

அதன்பின் பேசிய அவர், உலக மக்களால் மிகவும் பழமையான மொழியாக அறியப்படுவது தமிழ் எனவும், தமிழ் மொழியால் இந்தியாவுக்கு பெருமை எனவும் தெரிவித்தார்.