மோடியின் கல்விச் சான்றிதழ் உண்மையானது: பல்கலை., விளக்கம்

புதுதில்லி: பிரதமர் மோடியின் கல்விச் சான்றிதழ் உண்மையானது தான் என தில்லி பல்கலைக்கழகம் விளக்கம் அளித்துள்ளது.

பிரதமர் மோடியின் இளங்கலை மற்றும் முதுகலை பட்டம் தொடர்பாக அண்மையில் சர்ச்சை எழுந்தது. இதனை கையில் எடுத்த தில்லி முதல்வர் கெஜ்ரிவால் கடுமையாக விமர்சித்தார். மேலும், மோடி படிப்பு குறித்த தகவலை பல்கலைக்கழகங்கள் வெளியிட வேண்டும் என மத்திய தகவல் ஆணையமும் உத்தரவிட்டது.

இதனிடையே, மோடியின் இளங்கலை மற்றும் முதுகலை பட்டங்களை பாஜக வெளியிட்டது. மேலும், தவறான முறையில் பிரதமர் குறித்து பேசி வந்த கெஜ்ரிவால் மன்னிப்பு கோர வேண்டும் என்றும் பாஜக தெரிவித்தது.

ஆனால், பாஜக வெளியிட்டுள்ள சான்றிதழ்களில் இடம்பெற்றுள்ள பெயர் உள்ளிட்டவைகளில் சில முரண்பாடுகள் இருப்பதாக சுட்டிக்காட்டிய ஆம் ஆத்மி, இந்த சான்றிதழ்கள் போலியானவை என்று தெரிவித்தது.

இந்நிலையில், பிரதமர் மோடியின் இளங்கலை பட்ட சான்றிதழ் உண்மையானதுதான். அதுதொடர்பான அனைத்து பதிவேடுகளும் எங்கள் வசம் உள்ளன. அவற்றை பரிசோதித்து உறுதி செய்து விட்டோம். அவர் 1978-ஆம் ஆண்டு தேர்ச்சி பெற்றார். 1979-ஆம் ஆண்டு பட்டம் பெற்றார் என தில்லி பல்கலைக்கழகம் விளக்கம் அளித்துள்ளது.

இந்த தகவலை ஆம் ஆத்மி கட்சியினர் சிலர் தில்லி பல்கலைக்கழகத்தை அனுகியதை தொடர்ந்து, அப் பல்கலைக்கழகம் வெளியிட்டுள்ளது.

மேலும், மதிப்பெண் சான்றிதழிழ், மோடியின் பெயர் முரண்பாடாக இருப்பது பொதுவான தவறுதான். மற்ற மாணவர்களின் நடுப்பெயரிலும் இந்த தவறு இடம்பெற்றுள்ளது என்றும் பல்கலைக்கழகம் விளக்கம் அளித்துள்ளது.