பிரதமர் மோடி இன்று பிரஸ்ஸல்ஸ் பயணம்

டெல்லி: பெல்ஜியம் நாட்டின் தலைநகரான பிரஸ்ஸல்ஸில் நடக்கவுள்ள 13-வது இந்திய-ஐரோப்பிய யூனியன் மாநாட்டுக்கு இன்று பிரதமர் மோடி செல்கிறார்.

பிரதமர் நரேந்திர மோடி இன்று பெல்ஜியம் தலைநகர் பிரஸல்ஸ் சென்று, பெல்ஜியம் பிரதமர் சார்லஸ் மைக்கேலை சந்திக்கிறார். இதனையடுத்து, இந்தியா-ஐரோப்பிய யூனியன் உச்சி மாநாட்டில் கலந்து கொள்கிறார். இதன் பின்னர் வாஷிங்டன்னில் மார்ச் 31 மற்றும் ஏப்ரல் 1 ஆகிய தேதிகளில் நடக்கவுள்ள அணு பாதுகாப்பு மாநாட்டுக்கு பிரதமர் மோடி செல்கிறார்.

மேலும், சவுதி அரேபியாவுக்கு வரும் ஏப்ரல் 2 மற்றும் 3 ஆகிய தேதிகளில் பிரதமர் மோடி அரசு முறை பயணம் மேற்கொள்கிறார்

கடந்த 22-ஆம் தேதியன்று பெல்ஜியம் தலைநகர் பிரஸல்ஸில் நடந்த குண்டுவெடிப்பில் 35-க்கும் அதிகமானோர் உயிரிழந்தனர். இது குறித்து செய்தியாளர்களிடம் உரையாடிய இந்திய வெளியுறவு துறை முக்கிய அதிகாரி விகாஸ் ஸ்வரூப் கூறுகையில், "பிரஸ்ஸல்ஸ் குண்டுவெடிப்பு சம்பவம் குறித்தும், இந்தியர்களின் பாதுகாப்பு குறித்து இந்தியா உன்னிப்பாக கவனிக்கிறது" என்று தெரிவித்திருந்தார்.