ஆப்நகரம்

அடுத்தடுத்து மயங்கி விழுந்த மக்கள்; பால் தொழிற்சாலையில் அப்படி என்ன நடந்தது?

பந்தபள்ளி உள்ள பால் தொழிற்சாலையில் வேலை செய்து வந்த ஊழியர்கள் பலரும் மயங்கி விழுந்த சம்பவம் பெரும் பரபரப்பை ஏற்படுத்தியுள்ளது.

Samayam Tamil 21 Aug 2020, 7:12 am
ஆந்திர மாநிலம் சித்தூர் மாவட்டம் புட்டலபட்டு மந்தல் அடுத்த பந்தபள்ளியில் பால் தொழிற்சாலை ஒன்று செயல்பட்டு வருகிறது. அங்கு வேலை செய்து வந்த ஊழியர்கள் 14 பேர் நேற்று மாலை அடுத்தடுத்து மயங்கி விழுந்தனர். இதனால் அதிர்ச்சியடைந்த சக ஊழியர்கள் மற்றும் தொழிற்சாலை நிர்வாகம், உடனே மருத்துவமனைக்கு கொண்டு செல்லும் ஏற்பாடுகளைச் செய்தது. இதுபற்றி தகவலறிந்து சம்பவ இடத்திற்கு விரைந்து வந்த போலீசார் நிலைமை குறித்து விசாரணை நடத்தினர். அதாவது பால் தொழிற்சாலையில் அடைத்து வைக்கப்பட்டிருந்த வாயு கசிந்துள்ளது. இதனை நுகர்ந்த ஊழியர்கள் மயக்கம் அடைந்ததாக புட்டலபட்டு காவல்துறை துணை ஆய்வாளர் தெரிவித்துள்ளார்.

இதுபற்றி சித்தூர் மாவட்ட ஆட்சியர் நாராயண் பாரத் குப்தா கூறுகையில், புட்டலபட்டு அருகே செயல்பட்டு வரும் ஹட்சன் பால் தொழிற்சாலையில் மாலை 5 மணியளவில் அமோனியா வாயுக்கசிவு ஏற்பட்டுள்ளது. இதனால் ஊழியர்கள் பலரும் மயங்கி விழுந்துள்ளனர். இதுபற்றி தகவலறிந்து சம்பவ இடத்திற்கு போலீசார் புறப்பட்டுச் சென்றுள்ளனர். அந்த ஷிப்டில் வேலை பார்த்து வந்த 14 ஊழியர்கள் சித்தூரில் உள்ள மருத்துவமனையில் அனுமதிக்கப்பட்டனர். அவர்களில் மூன்று பேரின் நிலை கவலைக்கிடமாக உள்ளது.

போலீஸ்தான் காரணம் என வீடியோ வெளியிட்டு விவசாயி தற்கொலை!

அவர்கள் விரைவில் திருப்பதியில் உள்ள ருயா அல்லது எஸ்.வி.ஐ.எம்.எஸ் மருத்துவமனைக்கு மேல் சிகிச்சைக்காக அழைத்துச் செல்லப்பட வாய்ப்புள்ளது என்றார். சம்பவம் குறித்து மேலும் அவர் கூறுகையில், மற்ற ஊழியர்களின் உடல்நிலை சீராக உள்ளது. இவர்கள் அனைவரும் பெண்கள் என்பது குறிப்பிடத்தக்கது. நிர்வாகத்தின் அலட்சியம் காரணமாகவா அல்லது ஊழியர்களின் அலட்சியம் காரணமாக இந்த விபத்து நடந்ததாக என்று இன்னும் தெரியவரவில்லை.

தொழிலாளர் நலத்துறை பொது மேலாளர், தீயணைப்புத்துறை அதிகாரிகள் சம்பந்தப்பட்ட பால் தொழிற்சாலைக்குச் சென்று உண்மை நிலவரம் குறித்து ஆய்வு செய்து வருகின்றனர் என்றார். இந்த சூழலில் பால் தொழிற்சாலை விபத்து குறித்து சித்தூர் மாவட்ட ஆட்சியரிடம் மாநில அமைச்சர் பெட்டிரெட்டி ராமச்சந்திர ரெட்டி தொலைபேசியில் கேட்டறிந்தார். உடனே விரிவான விசாரணை நடத்த உத்தரவிட்டுள்ளார்.

திருப்பதி கோயில் சொத்து விவகாரம்; நீதிமன்றத்தில் தேவஸ்தானம் பதில்!

அதேசமயம் பாதிக்கப்பட்ட ஊழியர்களுக்கு தேவையான அனைத்து உதவிகளையும் செய்து தருமாறு வலியுறுத்தியுள்ளார். பால் தொழிற்சாலையில் வாயுக்கசிவு ஏற்பட்ட சம்பவம் ஆந்திர மாநில மக்களிடையே பரபரப்பை ஏற்படுத்தியுள்ளது. இம்மாநிலத்தில் தொடர்ச்சியாக வாயுக்கசிவு சம்பவங்கள் நிகழ்ந்து ஊழியர்களும், பொதுமக்களும் பாதிக்கப்பட்டு வருவது அதிர்ச்சியடைய வைக்கிறது.

அடுத்த செய்தி