shashi tharoor: ஷட்-டவுன் இந்தியா, ஷட்-அப் இந்தியா, சிட்-டவுன் இந்தியா என்று பெயர் வையுங்கள்... மத்திய அரசைக் கலாய்த்த சசி தரூர்

நாடாளுமன்ற பட்ஜெட் கூட்டத்தொடர் கடந்த சனிக்கிழமை (01.02.2020) தொடங்கியது. ஞாயிற்றுக்கிழமை விடுப்பைத் தொடர்ந்து திங்கள் கிழமை முதல் மீண்டும் தொடங்கி நடைபெற்று வருகிறது.

தாக்கல் செய்யப்பட்ட பட்ஜெட் மீதான விவாதம் மக்களவை உறுப்பினர்கள் மத்தியில் நடைபெற்று வருகிறது. இந்த விவாதத்தில் திருவனந்தபுரம் மக்களவைத் தொகுதி உறுப்பினர் சசி தரூர் பேசியபோது, அரசின் திட்டங்கள் பெயரளவில் மட்டும் இனிக்க இனிக்க இருக்கின்றன. ஆனால், உண்மையில் அவர்களது திட்டம் வேறாக இருக்கிறது என்பதைக் குறிப்பிட்டு கிண்டலாகப் பேசினார்.

அவர் பேசியதாவது, “ டிஜிட்டல் இந்தியா, ஸ்கில் இந்தியா, ஸ்டார்ட் அப் இந்தியா என்று வெறும் உதட்டளவில் இனிக்க இனிக்கப் பேசிக் கொண்டிருக்கிறார்கள். ஆனால், ஸ்டேண்ட் அப் இந்தியா என்ற வார்த்தையை இவர்கள் சொல்வதில் எந்த அர்த்தமும் இல்லை.

வெளியே ஸ்டேண்ட் அப் இந்தியா என்று சொல்லிக் கொண்டு ஸ்டேண்ட் அப் காமெடியன்களைக் கூட விடாமல் தடை செய்வதில் பிசியாக இருக்கிறீர்கள். இனிமேல் உங்கள் அரசுத் திட்டங்களுக்கு சிட்-டவுன் இந்தியா, ஷட் அப் இந்தியா, ஷட் டவுன் இந்தியா என்று பெயர் வைத்துக் கொள்ளுங்கள்.”

சிரிப்பூட்டும் விதமாக பேசுவதில் சசி தரூர் சிறந்தவர்தான் என்றாலும், இன்று நாடாளுமன்ற அவையில் சசி தரூர் பேசியிருக்கும் செய்தி அவ்வளவு எளிதில் சிரித்து விட்டு மட்டும் கடக்கக்கூடியது அல்ல.