கெஜ்ரிவால் அமைச்சரவையின் தின்பண்ட செலவு ரூ.1 கோடி

புதுதில்லி: தில்லி முதல்வர் அரவிந்த் கெஜ்ரிவால் அமைச்சரவையின் தின்பண்ட செலவு சுமார் ரூ.1 கோடி என தெரிய வந்துள்ளது.

தகவல் அறியும் உரிமை சட்டத்தின் கீழ் இது குறித்து கேட்கப்பட்ட கேள்விக்கு, கடந்த ஆண்டு பிப்ரவரி மாதம் முதல் கடந்த ஜூலை மாதம் வரை கணக்கிடப்பட்டு, தகவல் ஆணையம் தகவல் அளித்துள்ளது.

அதன்படி, தில்லி தலைமைச் செயலகத்தில் உள்ள முதல்வர் அலுவலகத்தில் தேநீர், பிஸ்கெட்டுகள், சமோசா உள்ளிட்ட தின்பண்டங்களுக்காக ரூ.22 லட்சத்து 42 ஆயிரத்து 320 செலவிடப்பட்டுள்ளது. அதேபோல் முதல்வர் இல்லத்தில் அமைந்துள்ள அவரது அலுவலகத்தில் ரூ.24 லட்சத்து 86 ஆயிரத்து 921 செலவிடப்பட்டுள்ளது.

மேலும், துணை முதல்வர் மணீஷ் சிசோடியாவின் அலுவலகத்தில் ரூ.5.62 லட்சமும், அவரது முகாம் அலுவலகத்தில் ரூ.5.66 லட்சமும் தின்பண்டங்களுக்காக செலவிடப்பட்டுள்ளதாக தெரிவிக்கப்பட்டுள்ளது.

அதேபோல், அமைச்சர்கள் கபில் மிஸ்ரா ரூ.6.30 லட்சம், இம்ரான் ஹுசேன் ரூ.5.89 லட்சம், சத்யேந்திர ஜெயின் ரூ.9.10 லட்சம், சந்தீப் குமார் சுமார் ரூ.8 லட்சம் எனும் அளவில் தின்பண்டங்களுக்காக செலவிடப்பட்டுள்ளது என்றும் அந்த தகவலில் குறிப்பிடப்பட்டுள்ளது.