தாயகம் திரும்பினார் சோனியா: காங்கிரஸில் விரைவில் அதிரடி மாற்றம்

புதுதில்லி: மருத்துவ பரிசோதனைக்காக வெளிநாடு சென்றிருந்த காங்கிரஸ் கட்சியின் தலைவர் சோனியா தாயகம் திரும்பியுள்ள நிலையில், அக்கட்சிக்குள் விரைவில் அதிரடி மாற்றங்கள் மேற்கொள்ளப்படலாம் என எதிர்பார்க்கப்படுகிறது.

காங்கிரஸ் தலைவர் சோனியாவின் (70) உடல்நிலை, அண்மை காலங்களில் அடிக்கடி பாதிப்படைந்து வருகிறது. கடந்த 2011-ம் ஆண்டு அமெரிக்கா சென்ற சோனியா, வெளியில் தெரிவிக்கப்படாத மருத்துவ காரணங்களுக்காக சிகிச்சை பெற்றுத் திரும்பினார். அதேபோல், கடந்த 2014-ஆம் ஆண்டில் நோய் தொற்றுக்காக தில்லி மருத்துவமனையில் சிகிச்சை பெற்றார்.

மேலும், கடந்த ஆண்டு பிரதமர் மோடியின் தொகுதியான வாரணாசியில் வாகன பேரணி நடத்தியபோது திடீரென உடல் நலம் பாதிக்கப்பட்டது. அப்போது உடனே தில்லிக்கு விமானத்தில் அழைத்து செல்லப்பட்டு மருத்துவமனையில் அனுமதிக்கப்பட்டு சிகிச்சை பெற்றார். அதனையடுத்து, நடைபெற்ற ஐந்து மாநில தேர்தல் பிரசாரங்களிலும் அவர் பங்கேற்கவில்லை. தேர்தல் முடிவுகள் வெளியான போது கூட, வழக்கமான மருத்துவப் பரிசோதனைக்காக அவர் வெளிநாடு சென்றுள்ளார் என அக்கட்சி வட்டாரங்கள் தெரிவித்திருந்தன.

ஆனால், அவர் எந்த நாட்டுக்கு சிகிச்சை மேற்கொள்ள சென்றார் என்பது குறித்த தகவல்கள் அப்போது வெளியாகவில்லை. வெளியில் தெரிவிக்கப்படாத மருத்துவ காரணங்களுக்காக அவர் சிகிச்சை பெற்றது அமெரிக்கா என்பதால், மருத்துவப் பரிசோதனைக்காக அந்நாட்டுக்கே அவர் மீண்டும் சென்றிருக்கலாம் எனக் கூறப்பட்டது.

இதனைத் தொடர்ந்து, காங்கிரஸ் கட்சியின் துணைத் தலைவரும், சோனியாவின் மகனுமான ராகுல் கடந்த 16-ம் தேதி வெளிநாடு கிளம்பிச் சென்றார். தனது தாயை கவனித்துக் கொள்வதற்காக அவர் வெளிநாடு சென்றுள்ளார் எனவும், கூடிய விரைவில் சோனியாவை அழைத்துக் கொண்டு ராகுல் நாடு திரும்புவார் எனவும் அக்கட்சியின் தலைமை செய்தித் தொடர்பாளர் ரந்தீப் சுர்ஜிவாலா தெரிவித்திருந்தார்.

இதனிடையே, உத்தரப்பிரதேசம் உள்ளிட்ட ஐந்து மாநில தேர்தல் குறித்து கருத்து தெரிவித்த ராகுல், வலுவான எதிர்கட்சியாக நாங்கள் செயல்படுவோம் எனவும், கட்சியில் பல்வேறு கட்டமைப்பு மற்றும் அமைப்புரீதியான மாற்றங்கள் விரைவில் கொண்டு வரப்படும் எனவும் தெரிவித்திருந்தார்.

இந்நிலையில், மருத்துவ பரிசோதனைக்காக வெளிநாடு சென்றிருந்த காங்கிரஸ் கட்சியின் தலைவர் சோனியா நேற்று முன்தினம் தாயகம் திரும்பினார். அவர் நலமுடன் இருப்பதாக அக்கட்சி வட்டாரங்கள் தெரிவித்துள்ளன. அத்துடன் ராகுல் ஏற்கனவே குறிப்பிட்டதை போல், காங்கிரஸ் கட்சியினுள் விரைவில் அதிரடி மாற்றங்கள் மேற்கொள்ளப்படலாம் என எதிர்பார்க்கப்படுகிறது.
Sonia returns back after health check up : soon we can get structural changes within the party