ஹைதராபாத்தில் கொரோனாவுக்கே டஃப் கொடுத்த ஸ்பானிஷ் காய்ச்சல்!

சார்ஸ், காலரா, பிளேக் என பல தொற்றுநோய்கள் குறிப்பிடப்பட்டாலும் 1918ஆம் ஆண்டு பரவிய ஸ்பானிஷ் காய்ச்சல் அதிகளவில் பேசப்படுகிறது. 102 ஆண்டுகளுக்கு முன்னர் பரவிய அந்த நோயால் உலகம் முழுவதும் பாதிப்பு ஏற்பட்டது. மூன்றில் ஒரு பங்கு பேர் இறந்ததாகவும் தகவல்கள் தெரிவிக்கின்றன. 1921ஆம் ஆண்டு ஹைதராபாத்தில் நடத்தப்பட்ட மக்கள்தொகை கணக்கெடுப்புப் படி பார்க்கும் போது அங்கு ஸ்பானிஷ் காய்ச்சல் ஏற்படுத்திய பாதிப்பை அடியொற்றியே கொரோனா வைரஸ் தாக்கம் இருப்பதாக கூறப்படுகிறது.

1918ஆம் ஆண்டு ஹைதராபாத்தில் ஸ்பானிஷ் காய்ச்சல் பரவும் போது கொரோனா வைரஸைப் போலவே முதலில் மிகக் குறைவானவர்களுக்கே இந்த பாதிப்பு ஏற்பட்டது. பின்னர் அதிகரித்துக்கொண்டே சென்று செப்டம்பர் மாதம் பல இடங்களுக்கும் பரவியது. அக்டோபர் இறுதியில் அதன் உச்சத்தை அடைந்தது. குறுகிய காலத்தில் பலரின் உயிரைக் குடித்த ஸ்பானிஷ் காய்ச்சல் நவம்பர் இறுதியில் குறையத் தொடங்கியது.

மிகக் குறைவாக ஆரம்பித்து படிப்படியாக உயர்ந்து உச்சத்தை அடைந்த ஸ்பானிஷ் காய்ச்சல் போலவே ஹைதராபாத்தில் கொரோனா வைரஸ் உள்ளது. ஒரு கட்டத்தில் உச்சத்தை அடைந்தபின்னரே அது குறையத் தொடங்கும் என தெரிகிறது. “நோய் பரவலில் ஸ்பானிஷ் காய்ச்சலும், கொரோனா வைரஸும் ஒரே மாதிரியாக உள்ளன. ஆனால் உயிரிழப்பு விகிதத்தில் ஸ்பானிஷ் காய்ச்சலே அதிக பாதிப்பை ஏற்படுத்தியுள்ளது. 1918ஆம் ஆண்டு அக்டோபர் இறுதியில் ஹைதராபாத்தில் இருவரில் ஒருவர் அந்தக் காய்ச்சலால் பாதிக்கப்பட்டனர்” INTACH அமைப்பைச் சேர்ந்த அனுராதா ரெட்டி தெரிவித்துள்ளார்.

1921ஆம் ஆண்டு மக்கள் தொகை கணக்கெடுப்பின்படி, 1918ஆம் ஆண்டு செப்டம்பர் இறுதியில் ஸ்பானிஷ் காய்ச்சல் காரணமாக ஆயிரம் பேருக்கு 46.5 பேர் உயிரிழந்துள்ளனர். மேலும் 1911 முதல் 1921 வரை ஸ்பானிஷ் காய்ச்சல் தவிர்த்து பிளேக், காலரா என மேலும் இரு தொற்று நோய்கள் பரவியுள்ளன. பிளேக்கால் ஒரு லட்சத்து 94 ஆயிரத்து 325 பேரும், காலராவால் 42 ஆயிரத்து 246 பேரும் பாதிக்கப்பட்டனர்.