நீதிபதிக்கே மனநிலை சரியில்லையா? மருத்துவ பரிசோதனைக்கு உச்சநீதிமன்றம் உத்தரவு

சென்னை உயர்நீதிமன்றத்தில் நீதிபதியாக பணியாற்றிய கர்ணன் கடந்த ஆண்டு கொல்கத்தா உயர்நீதிமன்றத்திற்கு மாற்றப்பட்டார். இதனைத் தொடர்ந்து சென்னை உயர்நீதிமன்ற தலைமை நீதிபதி மற்றும் உயர்நீதிமன்ற நீதிபதிகளுக்கு எதிராக புகார் தெரிவித்து உச்சநீதிமன்றத்தின் தலைமை நீதிபதி மற்றும் பிரதமர் ஆகியோர் உள்பட பலருக்கு கடிதம் அனுப்பி வைத்தார்.


இந்த புகார் தொடர்பாக கர்ணன் மீது உச்சநீதிமன்றம் தானாகவே நீதிமன்ற அவமதிப்பு வழக்கு தொடர்ந்தது. இந்த வழக்கு விசாரணையில் கர்ணன், உச்சநீதிமன்றத்தின் 7 நீதிபதிகள் கொண்ட அமர்வு முன்பு ஆஜரானார். இந்த வழக்கை விசாரித்த நீதிபதிகள் கூறுகையில், கர்ணன் தான் கூறிய புகார் தொடர்பாக மன்னிப்பு கேட்க தயாராக இருக்கிறாரா இல்லை, தானாக வழக்கறிஞர் வைத்து வாதாடுவதற்கு விரும்புகின்றாரா என்று கேள்வி எழுப்பினர்.

இந்நிலையில், இந்த வழக்கு தொடர்பாக மத்திய அரசின் அட்டர்னி ஜெனரல் கூறுகையில், இந்த வழக்கில் சமரசம் என்ற பேச்சுக்கே இடமில்லை. கர்ணன் எல்லாவற்றையும் தெரிந்தே செய்திருக்கிறார் என்று தெரிவித்துள்ளார்.

இதற்கு நீதிபதிகள், கர்ணனின் மனநிலை தெளிவாக இல்லை என்று நாங்கள் கருதுகிறோம். அவர் என்ன செய்தார் என்பதை புரிந்துகொள்ளும் மனநிலையில் தற்போது இல்லை என்று தெரிவித்துள்ளனர்.

இது குறித்து பேசிய கர்ணன் கூறுகையில், எனது வேலையை செய்ய அனுமதித்தால் எனது இயல்பான மனநிலைக்கு திரும்புவேன். இல்லையென்றால் அடுத்த முறை நீதிமன்றத்திற்கு வரமாட்டேன். முடிந்தால் என்னை சிறைக்கு அனுப்புங்கள் என்று அடாவடியாக பதிலளித்துள்ளார்.

இதனை ஏற்க மறுத்த நீதிபதிகள், இந்த வழக்கு தொடர்பாக 4 வாரங்களுக்குள் பதிலளிக்க உத்தரவிட்டனர். இந்நிலையில், இன்று விசாரணைக்கு வந்த இந்த வழக்கு வரும் 5ம் தேதி நீதிபதி கர்ணனின் மனநிலை குறித்து மருத்துவ பரிசோதனை நடத்த நீதிமன்றம் உத்தரவு பிறப்பித்துள்ளது. இதனைத் தொடர்ந்து அறிக்கையை வரும் 8ம் தேதிக்குள் தாக்க செய்ய கொல்கத்தா மருத்துவமனைக்கு உத்தரவிட்டுள்ளது.