தாஜ்மகால் பெயர் கிருஷ்ணா மஹால் என மாற்ற வேண்டும் - எம்.எல்.ஏ சர்ச்சை பேச்சு

உலக அதிசயங்களில் ஒன்றான தாஜ் மஹாலின் பெயரை ராம் மஹால் என மாற்ற வேண்டும் என உத்தரப் பிரதேச எம்.எல்.ஏ சர்ச்சை கருத்தை தெரிவித்துள்ளார்.

உத்தரபிரதேச மாநில பைரியா தொகுதியில் தேர்ந்தெடுக்கப்பட்ட சட்டமன்ற உறுப்பினர் சுரேந்தர் சிங். இவர் அடிக்கடி கூறும் சர்ச்சை கருத்துக்களால் பெயர் போனவர். அண்மையில் அவர், அரசு ஊழியர்களை விட பாலியல் தொழில் செய்பவர்கள் தங்கள் வேலையை சரியாக செய்கிறார்கள் என கருத்து தெரிவித்தது கடும் சர்ச்சையானது.

இந்நிலையில், லக்னோவில் செய்தியாளர்களை சந்தித்த சுரேந்தர் சிங், “முகலாய மன்னர்களால் கட்டப்பட்ட பல நினைவு சின்னங்கள் இந்திய மண்ணில் இருந்து கட்டமைக்கப்பட்டவை. அதனால் அவற்றை அழிக்க வேண்டிய அவசியம் இல்லை. ஆனால் அவற்றிற்கு பெயரை மாற்ற வேண்டும்.
அந்த வகையில் தாஜ்மகாலின் பெயரை ராம் மாஹால் அல்லது கிருஷ்ணர் மஹால் அல்லது சிவாஜி மஹால் என்ற பெயர்களில் ஒன்றை வைக்கலாம்.” என கருத்து தெரிவித்திருந்தார்.

இவரின் கருத்துக்கு மீண்டும் சர்ச்சை கிளம்பியதோடு, எதிர்கட்சியினர் கண்டனத்தை தெரிவித்துள்ளனர்.