''குண்டான்'' இருக்கும்போது ஹெல்மெட் எதுக்கு.? வாகன ஓட்டியின் ஐடியா.. வைரலாகும் வீடியோ.!

புதிய மோட்டார் வாகன சட்டம் அமல்படுத்தப்பட்ட நாளிலிருந்து நாடு முழுவதும் போக்குவரத்து விதிகளை மீறுபவர்கள் மீது கடுமையான அபராதம் வசூலிக்கப்படுகிறது. இதனால் பலபேர் பைக்கை விட்டு விட்டு பேருந்து மற்றும் ரயில் மூலம் பயணம் செய்து வருகின்றனர். அந்த அளவிற்கு அபராத தொகை பலமடங்கு உயர்ந்துள்ளது.

இந்நிலையில் குஜராத் மாநிலம் ராஜ்கோட்டில் வாகன ஓட்டி ஒருவர் ஹெல்மெட் இல்லாததால் அதற்குப் பதிலாக ஸ்டீல் குண்டானைத் தலையில் அணிந்துகொண்டு பைக் ஓட்டியுள்ளார். இந்த வீடியோவை அங்கு இருந்த டோடியா என்ற வழக்கறிஞர் தனது மொபைலில் எடுத்திருக்கிறார்.

வீடியோ நிகழ்வைக் குறித்து டோடியா கூறுகையில், பைக்கில் செல்லும் அந்த நபர் ராஜ்கோட் சாலையில் உள்ள ஒரு கடையில் தனது நண்பர்களுடன் பேசிக்கொண்டிருந்தார். வெகுநேரமாக அவர்கள் புதிய மோட்டார் சட்டத்தினை பற்றி விவாதித்துக்கொண்டிருந்தனர். நானும் அவர்களுக்கு அருகில்தான் அமர்ந்திருந்தேன். உடனே அந்த நபர் தலைக்கவசம் இல்லை என்றால் கவலை இல்லை.

அதற்குப் பதிலாக என்னிடம் ஒரு கவசம் உள்ளது. அதுவே தலையைக் காக்கும்பொழுது விலையுயர்ந்த ஹெல்மெட் எதற்கு என இவ்வாறு கூறிக்கொண்டே சென்றார். அவர் எதையோ செய்யப்போகிறார் என உணர்ந்த நான் உடனே எனது மொபைலை எடுத்து வீடியோ எடுக்க ஆரம்பித்தேன். பிறகு அவர் வைத்திருந்த குண்டானைத் தலையில் மாட்டிக்கொண்டு பைக்கில் புறப்பட்டார் என வீடியோ எடுத்த வழக்கறிஞர் கூறினார்.