டெல்லி: மசூதி உச்சியில் காவிக் கொடி பறந்த வீடியோ, பின்னணி என்ன?

டெல்லியில் தொடர்ந்து 4வது நாளாக மதக் கலவரம் நிகழ்த்தப்பட்டு வருகிறது. போராட்டத்தில் இதுவரை சுமார் 20 பேர் உயிரிழந்துள்ளனர். இந்த கலவரத்தில் போது குறிப்பிட்ட மதத்தினர் தாக்கப்படுவது தொடர்பாக எடுக்கப்பட்ட வீடியோ, போலீசை நோக்கி துப்பாக்கிச் சூடு நடத்தும் வீடியோ, வழிப்பாட்டு தளங்களைச் சேதமாக்கும் வீடியோ என வன்முறையைத் தூண்டும் வகையில் தொடர்ந்து வீடியோக்கள் பரவி வருகிறது.

இந்த சூழலில் குடியிருப்பு பகுதியிலிருக்கும் மசூதி ஒன்றின் மீது ஏறி மர்ம நபர் ஒருவர் இந்து கடவுளான ஆஞ்சநேயரின் உருவப் படம் கொண்ட காவிக் கொடி ஒன்றைக் குத்தி வைப்பதுமாக, இந்த நிகழ்விற்குப் பின்னால் தீ எரிந்து புகை வருவதுமாக வீடியோ ஒன்று வாட்ஸ்ஆப் உள்பட சமூக வலைதளத்தில் வைரலாக ஷேர் செய்யப்பட்டு வந்தது. இந்த வீடியோ டெல்லியில் இந்து மத வெறியர்களால் இப்போது நடத்தப்பட்டது என்றும் அதில் குறிப்பிடப்பட்டிருந்தது.

குறிப்பாக அந்த வீடியோ தொடர்பான விளக்கத்தில், “இந்த வீடியோ டெல்லி அசோக் நகர்ப் பகுதியில் எடுக்கப்பட்டது. இந்துத்துவா தீவிரவாத கும்பல் மத உணர்வைக் காயப்படுத்துவதைப் பாருங்கள்” எனப் பகிரப்பட்டது. இதற்கிடையே சில இந்த வீடியோ அசோக் விஹாரில் எடுக்கப்பட்டது என்றும் பதிவிட்டனர்.

தாங்க முடியாத துயரத்தில் டெல்லி, பலி எண்ணிக்கை 17

இதனிடையே டைம்ஸ்நவ் நிருபரிடம் போலீஸார் மசூதி தாக்கப்படும் வீடியோ குறித்துக் கூறுகையில், “இது பொய்யான வீடியோ. இப்போதைய நேரத்தில் இதுபோன்ற ஒரு சம்பவம் டெல்லியில் நடக்கவில்லை. வெவ்வேறு இடங்களை குறிப்பிட்டு இந்த வீடியோவை இணையத்தில் பகிர்ந்து வருகின்றனர். தயவு செய்து மக்கள் இதைப் பகிர வேண்டாம் எனக் கேட்டுக் கொள்கிறோம்” என்றார்.

இதற்கிடையே டெல்லியில் இதுவரை கலவரம் தொடர்பாக 11 எப்ஐஆர் பதிவு செய்யப்பட்டுள்ளது. தொடர்ந்து இந்த கலவரம் காரணமாக உயிர் பலி எண்ணிக்கை அதிகரிக்கும் என அஞ்சப்படுகிறது.

அதேபோல் வன்முறையைத் தூண்டும் வகையில் வீடியோக்கள், ஆதாரமற்ற வீடியோக்களை ஊடகங்கள் பரப்புவதில் கவனமாக இருக்க வேண்டும் என டெல்லி அரசு அறிவுறுத்தியுள்ளது. எனினும், இந்த வீடியோ உண்மைதான் என டெல்லியில் வசிக்கும் சிலர் ஆதாரத்துடம் புகைப்படங்களை எடுத்து அதை வெளியிட்டு வருகின்றனர்.