விரைவில் வெளியாகிறது சுவிஸ் வங்கிக் கணக்கு விபரங்கள்..!

தங்கள் நாட்டில் உள்ள வங்கிகள் சேமிப்புக் கணக்கு வைத்திருப்பவர்களின் விபரங்களை வெளியிட உள்ளதாக சுவிட்சர்லாந்து அரசு அறிவித்துள்ளது.

சுவிட்சர்லாந்து நாட்டில் உள்ள வங்கிகளில் இந்திய செல்வந்தர்கள் பலரின் கருப்புப் பணம் பெருமளவு குவிந்திருப்பதாக மத்திய அரசே தெரிவித்திருந்தது.எனவே இந்த வங்கிகளில் இருக்கும் கருப்புப் பணத்தை பறிமுதல் செய்ய,சுவிஸ் வங்கிகளில் கணக்கு வைத்திருக்கும் இந்தியர்களின் விபரங்களை பெற மத்திய அரசு முயற்சி செய்தது.ஆனால் அதற்கு சுவிட்சர்லாந்து அரசு மறுப்பு தெரிவித்துவிட்டது.

இந்நிலையில் தங்களது நாட்டு வங்கிகளில் உள்ள வெளிநாட்டினரின் வங்கி கணக்கு விபரங்களை அளிக்க இருப்பதாக சுவிட்சர்லாந்து அதிரடியாக அறிவித்துள்ளது.இதுகுறித்த அறிவிப்பை வெளியிட்டுள்ள அந்நாட்டு நிதி அமைச்சகம்,”ரகசிய தகவல்களை பகிர்ந்து கொள்ளும் AEOI உடன்பாட்டின்படி,அதில் கையெழுத்திட்டுள்ள இந்தியா,மெக்சிகோ,அர்ஜெண்டினா உள்ளிட்ட 22 நாடுகளிடம் சுவிட்சர்லாந்து நாட்டின் ரகசிய தகவல்கள் பறிமாறிக் கொள்ளப்படும்.இந்த நடவடிக்கைகளுக்கான விதிமுறைகள் வரும் 2018-ஆம் ஆண்டு தொடங்கும்.ரகசியங்களை பறிமாறிக் கொள்ளும் நடவடிக்கைகள் வரும் 2019-ஆம் ஆண்டு தொடங்கும்.”என தெரிவித்துள்ளது.

இதன் மூலம் இனி இந்தியா உட்பட 22 நாடுகள் கேட்கும் சுவிஸ் வங்கிக் கணக்குகள் குறித்த தகவல்கள் சுவிட்சர்லாந்து அரசு அளிக்கும்.இதன் மூலம் இந்திய கருப்புப் பண ஆசாமிகளின் பெயர்கள் வெளியாவதற்கான மற்றொரு வாய்ப்பு கிடைத்துள்ளது எனலாம்.


Switzerland ready to provide details on black money